SALM 16 - Khasi CL Bible (BSI)

Ka jingduwai jong ka jingsngewskhem

¹ To da ïa nga, A Blei; nga shaniah ha me ban ïoh ka jingshngain.

² Nga ong ha U Trai, “Me long U Trai jong nga; kiei kiei kiba bha baroh kiba nga don ki la wan na me.”

³ Katno kiba bha palat ki long ki briew kiba ïaineh ha U Trai! ka jingsngewbha kaba khraw tam jong nga ka long ban ïadon bad ki.

⁴ Kito kiba beh stet sha kiwei ki blei ki wallam bun ki jingjynjar halor lade hi. Ngan ym ïashim bynta ha ki jingkñia jong ki; ngan ym mane ïa ki blei jong ki.

⁵ Ma me, A Trai, me long baroh uba nga don, bad me ai ha nga ïa baroh kaba nga donkam; ka lawei jong nga ka don ha ki kti jong me.

⁶ Katno kiba phylla long ki jingai sngewbha jong me ïa nga; katno ki long kiba bha!

⁷ Nga ïaroh ïa U Trai, namar ba u kdew lynti ïa nga, bad mynmiet ka jingïatiplem jong nga ka maham ïa nga.

⁸ Nga tip borabor ïa ka jingdon ryngkat jong U Trai; u don hajan, yn ym don kano kano kaba lah ban pynkhih ïa nga.

⁹ Bad kumta nga dap da ka jingsngewnguh bad ka jingkmen, bad nga sngewshngain nadong shadong,

¹⁰ namar me ïada ïa nga na ka bor jong ka jingïap. Nga la shakri hok ïa me, bad men ym iehnoh ïa nga ha ka pyrthei kiba ïap.

¹¹ Men pyn-i ha nga ïa ka lynti kaba lam sha ka jingim; ka jingdon ryngkat ka jong me ka pyndap ïa nga da ka jingkmen, bad ka wallam ha nga ka jingsngewbha junom.