SALM 15 - Khasi CL Bible (BSI)

Aïu U Blei u kwah

¹ A Trai, mano ba lah ban rung shapoh ka Templ jong me? Mano ba lah ban mane ha Seïon, u lum bakyntang jong me?

² U briew uba kohnguh ïa U Blei ha kiei kiei baroh bad uba leh ïa kaei kaba dei, uba ki ktien jong u, ki long kiba shisha bad kiba sngur,

³ bad ki bym pynbudnam ïa kiwei. Um leh kano kano kaba sniew ïa ki paralok jong u lymne uba pynphriang ki hamsaïa shaphang ki paramarjan jong u.

⁴ U ibeiñ ïa kito kiba U Blei u la kyntait, hynrei u ai burom ïa kito kiba kohnguh ïa U Trai. U ïai pyndep ïa kaei kaba u kular, kam pher katno ka shongdor.

⁵ U ai ram khlem da kheiñ sut, bad u bym shah pynbam sap ban sakhi pyrshah ïa kiba lui lui. Uno uno uba leh ïa kine kiei kiei un ïailong uba skhem.