SALM 148 - Khasi CL Bible (BSI)

Ka jingkhot ïa ka pyrthei baroh ban ïaroh ïa U Blei

¹ To ïaroh ïa U Trai! To ïaroh ïa U Trai na bneng, phi kiba im ha ki jaka bakynjang shajrong.

² To ïaroh ïa u, phi baroh ki angel jong u, baroh ki shipai bneng jong u.

³ To ïaroh ïa u, phi ka sngi bad u bnai; to ïaroh ïa u, phi ki khlur baphyrnai.

⁴ To ïaroh ïa u, phi ki bneng bajrong tam, bad ki um halor ka sahit bneng.

⁵ Ai ba baroh kin ïaroh ïa ka kyrteng jong U Trai! U shu hukum, bad ïa ki la pynlong;

⁶ da ki hukum jong u ïa ki la pynneh ha ki jaka jong ki junom, bad kim lah khlem kohnguh.

⁷ To ïaroh ïa U Trai na ka pyrthei, phi ki mrad duriaw baheh bad baroh ki jingjylliew jong ka duriaw-bah;

⁸ phi ka leilieh bad u phria, ka ïor bad ki lyoh, ki lyer bakhlaiñ kiba kohnguh ïa ka hukum jong u.

⁹ To ïaroh ïa u, phi ki lumrit bad ki lumbah, ki diengsoh bad ki khlaw;

¹⁰ baroh ki mrad ba la pynjuh bad kiba ha khlaw, ki mrad bapar bad ki sim.

¹¹ To ïaroh ïa u, phi ki syiem bad phi ki jaitbynriew baroh, ki khun syiem shynrang bad baroh kiwei ki nongsynshar;

¹² ki samla kynthei bad ki samla shynrang, kiba la tymmen bad ki khynnah ruh.

¹³ Ai ba ma ki baroh kin ïaroh ïa ka kyrteng jong U Trai! Ka kyrteng jong u ka kham khraw ban ïa baroh kiwei pat; ka burom jong u ka long halor ka pyrthei bad ka bneng.

¹⁴ U pynlong ïa ka hima jong u kaba khlaiñ, ba kumta baroh ki briew jong u ki ïaroh ïa u — ki paid Israel, kiba u ieit eh. To ïaroh ïa U Trai!