SALM 147 - Khasi CL Bible (BSI)

Kaba ïaroh ïa U Blei Badonbor Baroh

¹ To ïaroh ïa U Trai! Ka long kaba bha ban rwai ïaroh ïa U Blei jong ngi; ka long kaba sngewtynnat bad kaba dei ban ïaroh ïa u.

² U Trai u tei pat ïa ka Jerusalem; u wallam pat ïa kiba la shah ringmraw.

³ U pynkhiah ïa kiba la pait dohnud bad u sop spaiñ ïa ki jingmong jong ki.

⁴ U rai ïa ka jingdon jong ki khlur bad u khot ïa uwei pa uwei da ka kyrteng.

⁵ Uba khraw bad uba donbor long U Trai jong ngi; ïa ka jingstad jong u ym lah ban thew.

⁶ U kyntiew ïa kiba sngewrit, hynrei u pynlwet ïa ki bymman ha ka khyndew.

⁷ To rwai ki jingrwai jong ka jingïaroh ïa U Trai; tem ïa ki sur ha ka duitara ha U Blei jong ngi.

⁸ U pynphriang ïa ki lyoh ha ka suiñbneng; u pynbiang slap ïa ka khyndew bad u pynlong ba u phlang un mih ha ki lum.

⁹ U ai ïa ki jingri ïa ka jingbam jong ki bad u bsa ïa ki khun tyngab haba ki pah.

¹⁰ Ka jingsngewbha jong u kam long ha ki kulai bakhlaiñ; lymne ka jingkmen jong u ha ki shipai bashlur;

¹¹ hynrei u sngewbha ha kito kiba pyndonburom ïa u, ha kito kiba shaniah ha ka jingieit baneh jong u.

¹² To ïaroh ïa U Trai, ko Jerusalem! To ïaroh ïa U Blei jong pha, ko Seïon!

¹³ U pynskhem ïa ki khyrdop jong phi; u kyrkhu ïa ki briew jong phi.

¹⁴ U pynlong ïa ki pud jong phi ban long skhem bad u pynkdang ïa phi da u kew babha tam.

¹⁵ U ai hukum ïa ka pyrthei, bad ïa kaei kaba u ong la leh kloi.

¹⁶ U pyiar ïa ka ïor kum ka nep bad u pynphriang ïa u thah kum ka khyndew.

¹⁷ U phah ïa u phria kum u mawria; ym don uba lah ban shah ïa ka jingkhriat ba u phah!

¹⁸ Hadien pat u ai ka hukum, bad u thah u um; u phah ïa ka lyer, bad ka um ka tuid.

¹⁹ U ai ïa ka khubor jong u sha ki briew jong u, ki jingbthah bad ki aiñ jong u ïa ki Israel.

²⁰ Um shym la leh ïa kane ha kiwei pat ki jaitbynriew; kim tip ïa ki aiñ jong u. To ïaroh ïa U Trai!