SALM 146 - Khasi CL Bible (BSI)

Kaba ïaroh ïa U Blei u nongpynim

¹ To ïaroh ïa U Trai! To ïaroh ïa U Trai, ko mynsiem jong nga!

² Ngan ïaroh ïa u katba nga dang im; ngan rwai ha U Blei jong nga baroh shi lynter ka jingim jong nga.

³ Wat buh ïa ka jingshaniah jong phi ha ki nongïalam ba kynja briew; ym don u briew uba lah ban pyllait im ïa phi.

⁴ Haba kin ïap, kin leit phai pat sha ka khyndew; ha kata ka sngi baroh ki jingthmu jong ki kin sa kut noh.

⁵ Suk uta u briew uba don U Blei jong u Jakob ban ïarap ïa u bad uba shaniah ha U Trai U Blei jong u,

⁶ U Nongthaw jong ka bneng, ka pyrthei bad ka duriaw, bad baroh kiba don ha ki. U bat ïa ki jingkular jong u borabor;

⁷ ha ka jingbishar, u don ha ka liang kiba shah banbeiñ bad u ai jingbam ïa kiba thngan. U Trai u pyllaitluid ïa ki koidi

⁸ bad u pynpeit pat ïa kiba matlah. U khyllie ïa kito kiba la kyllon noh; u ieit ïa ki briew kiba hok jong u.

⁹ U ïada ïa ki nongwei kiba shong basah ha ka ri jong ngi; u ïarap ïa ki riewkynthei bad ki khunswet, hynrei u leit lam ïa ki bymman sha ka jingjot jong ki.

¹⁰ U Trai u long u syiem junom. U Blei jong pha, ko Seïon, un synshar baroh shi rta. To ïaroh ïa U Trai!