SALM 145 - Khasi CL Bible (BSI)

Ka jingrwai jong ka jingïaroh

¹ Ngan pynbna ïa ka jingkhraw jong me, A U Blei bad u syiem jong nga; ngan ainguh ïa me junom la junom.

² Man ka sngi ngan ainguh ïa me; ngan ïaroh ïa me junom la junom.

³ U Trai u long uba khraw ïa uba dei ban ïaroh eh; ka jingkhraw jong u ka long palat ïa ka jingshemphang.

⁴ Yn ïaroh ïa kaei kaba me la leh na kawei ka pateng bynriew sha kawei pat; kin pynbna ïa ki jingtrei borbah jong me.

⁵ Kin kren shaphang ka burom bad ka jinglong syiem jong me, bad ngan puson ïa ki kam baphylla jong me.

⁶ Ki briew ki kren shaphang ki jingtrei borbah jong me, bad ngan pynbna ïa ka jingkhraw jong me.

⁷ Kin ïathuh shaphang ka jingbha jong me baroh bad rwai shaphang ka jingsbun jong me.

⁸ U Trai u long uba dap da ka jingieit bad uba isynei, uba suki ban bitar bad uba dap da ka jingieit baneh.

⁹ U long uba bha ïa baroh bad u don ka jingsngewsynei ïa baroh kiba u la thaw.

¹⁰ Baroh ki jingthaw jong me, A Trai, kin ïaroh ïa me, bad baroh ki briew jong me kin ainguh ïa me.

¹¹ Kin ïathuh shaphang ka burom jong ka bor syiem jong me bad kin ïathuh shaphang ka bor bakhraw jong me,

¹² ba baroh kin tip shaphang ki jingtrei borbah jong me bad ka burom bakhraw jong ka hima jong me.

¹³ Ka jingsynshar jong me ka long bymjukut, bad me long u syiem junom. U Trai u long uba ïaineh ha ki jingkular jong u, bad uba isynei ha ki kam jong u baroh.

¹⁴ U ïarap ïa kito kiba don hapdeng ka jingjynjar; u khyllie ïa kito kiba la kyllon noh.

¹⁵ Baroh kiei kiei kiba im ki khmih da ka jingkyrmen sha me, bad me ai ïa ki ka jingbam haba ki donkam ïa ka.

¹⁶ Me ai ïa ki ha ban da biang bad me pynhun ïa ki jingdonkam jong ki baroh.

¹⁷ U Trai u long uba hok ha baroh kaba u leh, uba isynei ha baroh ki jingleh jong u.

¹⁸ U long hajan kito kiba khot kyrpad ïa u, kiba khot kyrpad ïa u da ka dohnud kaba beit.

¹⁹ U pyndap ïa ki jingdonkam jong kito kiba pyndonburom ïa u; u sngew ïa ki jingkyang jong ki bad u pynim ïa ki.

²⁰ U ïada ïa kito baroh kiba ieit ïa u, hynrei un pynjot ïa ki bymman.

²¹ Ngan ïaroh ïa U Trai borabor; to ai ba ki jingthaw jong u baroh kin ïaroh ïa ka kyrteng bakhuid jong u junom.