SALM 143 - Khasi CL Bible (BSI)

Ka jingduwai ban ïoh jingïarap

¹ A Trai, to sngew ïa ka jingduwai jong nga! Ha ka jinglonghok jong me to shahshkor ïa ka jingkyrpad jong nga; ha ka jingïaineh jong me, to jubab ïa nga!

² To wat buh ïa nga, u shakri jong me, ha ka jingtynjuh; ym don uba lui lui ha khmat jong me.

³ U nongshun jong nga u behmrad ïa nga bad u jop thiaw ïa nga. U set ïa nga ha ka byndi ba-dum, bad nga long kum kito kiba la ïap la slem.

⁴ Kumta nga la sdang ban iehnoh khlem ïaleh shuh; nga don hapdeng ka jingduh jingkyrmen.

⁵ Nga kynmaw ïa ki sngi ba la leit noh; nga pyrkhat ïa kata baroh kaba me la leh, nga kynmaw ïa baroh ki jingleh jong me.

⁶ Nga rah ïa ki kti sha me ha ka jingduwai; kum ka khyndew ba-tyrkhong ka mynsiem jong nga ka sliang ïa me.

⁷ To jubab ïa nga mynta, A Trai! Nga la duh baroh ka jingkyrmen. To wat buhrieh ïa lade na nga, ïoh ngan long hapdeng kito kiba leit hiar sha ka pyrthei kiba ïap.

⁸ To pynkynmaw ïa nga man la ka step ïa ka jingieit baneh jong me, naba nga buh ïa la ka jingshaniah ha me. Ki jingduwai jong nga ki kiew sha me; to pyn-i ïa nga ïa ka lynti ba nga dei ban leit.

⁹ Nga leit sha me na ka bynta ka jingïada, A Trai; to pyllait im ïa nga na ki nongshun jong nga.

¹⁰ Me long U Blei jong nga; to hikai ïa nga ban leh ïa ka mon jong me. Long uba bha ïa nga, bad to ïalam ïa nga ha ka lynti bym don jingma.

¹¹ To pyllait ïa nga, A Trai, kumba me la kular; ha ka jingbha jong me to pyllait ïa nga na ki jingjynjar jong nga!

¹² Namar ka jingieit jong me ïa nga, to pynïap noh ïa ki nongshun jong nga bad to pynjot ïa baroh ki nongbanbeiñ, namar nga long u shakri jong me.