SALM 140 - Khasi CL Bible (BSI)

Ka jingduwai ban ïoh jingïada

¹ To pyllait ïa nga, A Trai, na ki nongkam bymman; to ri pynim ïa nga na ki briew ba leh jubor.

² Ki ïasylla ïa ki kam bymman borabor, borabor ki pynkhih ïa ki jingïakajia.

³ Ki thylliej jong ki, ki long kum ki bseiñ bashyrkhei, ki ktien jong ki kum ka bih seiñïong.

⁴ To ïada ïa nga, A Trai, na ka bor ki bymman; to ri pynim ïa nga na ki briew ba leh jubor kiba sylla ïa ka jingkyllon noh jong nga.

⁵ Ki briew kiba sarong ki la pynap jingriam ïa nga; ki la phriang ïa la ki jar, bad shi lynter lynti ki la pynap jingriam ïa nga.

⁶ Nga ong ha U Trai, “Me long U Blei jong nga.” To shahshkor ïa ka jingïam jong nga ban ïoh jingïarap, A Trai!

⁷ Ko Trai Nongsynshar jong nga, u nongkyrshan bakhlaiñbor jong nga, me la ïada ïa nga ha ka thma.

⁸ A Trai, wat ai ha ki bymman ïa kaei ba ki kwah; wat ai ba ki buit sniew jong ki kin urlong.

⁹ Wat ai ba ki nongshun jong nga kin jop; pynlong ïa ki jingbyrngem jong ki pyrshah ïa nga ba kin hap kylla ha ki.

¹⁰ Ai ba ki rnga barhem kin hap halor jong ki; ai ba kin shah bret shapoh ka thliew bad kin ym lah shuh ban mih.

¹¹ Ai ba kito kiba pharep bymdei ïa kiwei kin ym jop; ai ba kaba sniew kan lap ïa ki briew kiba leh jubor bad pynjot ïa ki.

¹² A Trai, nga tip ba me kyrshan na ka bynta kiba duk bad ïa ki hok jong kiba kyrduh.

¹³ Da shisha kiba hok kin ïaroh ïa me; kin ïoh shong ha ka jingdon ryngkat jong me.