SALM 14 - Khasi CL Bible (BSI)

Ka jingbymman ki briew

¹ Kiba bieit ki ong ha lade, “Ym don Blei.” Ki baroh ki long kiba jakhlia, bad ki la leh ïa kiei kiei kiba shyrkhei; Ym don uwei ruh uba leh ïa kaba dei.

² U Trai u jngoh na bneng ïa u khunbynriew ban ïohi lada dang don mano mano bastad, bad ba mane ïa U.

³ Hynrei ki baroh ki la ïaid bakla, ki la ïalong lang kiba sniew. Ym don uwei ruh na ki uba leh ïa kaba dei, ym don uwei ruh.

⁴ “Hato kim tip?” U Trai u kylli. “Hato kine ki nongleh kam sniew kim tip ei ei? Ki im da kaba lute ïa ki briew jong nga, bad kim ju duwai sha nga.”

⁵ Hynrei pynban kin sngewshyrkhei shikatdei eh, naba U Blei u don bad kito kiba kohnguh ïa u.

⁶ Ki nongleh kam sniew ki pynpulom ïa ki jingthmu jong kiba sngewrit, hynrei U Trai u long ka jingïada jong ki.

⁷ Katno nga duwai ba ka jingjop kan wan ha ki Israel na Seïon. Katno kan long ka jingkmen ki paid Israel haba U Trai un pyndap kyrhai biang ïa ki!