SALM 137 - Khasi CL Bible (BSI)

Ka jingrwai bynñiaw ki Israel ha ka jinglongmraw

¹ Harud ki wah ka Babilon ngi la shong; hangta ngi ïam haba ngi kynmaw ïa ka Seïon.

² Ha ki dieng Jamynrei kiba don hajan ngi la wah ïa la ki duitara.

³ Kito kiba la ringmraw ïa ngi ki ong ba ngin rwai; ki ong ïa ngi ba ngin pynsngewbha ïa ki: “To rwai ha ngi ïa ka jingrwai shaphang ka Seïon.”

⁴ Kumno keiñ ngi lah ban rwai ïa ka jingrwai ha U Trai ha ka ri nongwei?

⁵ To ai ba ngan nym lah shuh ban tem biang ïa ka duitara lada nga klet ïa pha, ko Jerusalem!

⁶ To ai ba ngan nym lah shuh ban rwai biang lada ngam kynmaw ïa pha, lada ngam pyrkhat ïa pha kum ka jingkmen bakhraw tam jong nga!

⁷ To kynmaw, A Trai, kaei kaba ki Edom ki la leh ha ka sngi ba kurup ïa ka Jerusalem. To kynmaw kumno ki ïai-ong, “To pynjot thiaw ïa ka!”

⁸ Ko ka Babilon, yn sa pynjot ïa pha. Suk uta u briew uba siew kylliang ïa pha na ka bynta kaei kaba pha la leh ïa ngi —

⁹ kiba shim ïa ki khunlung jong pha bad lynthaw ïa ki ha u mawsiang.