SALM 136 - Khasi CL Bible (BSI)

Ka jingrwai ainguh

¹ To ainguh ïa U Trai, namar u long uba bha; ka jingieit jong u ka neh bymjukut.

² To ainguh ïa uba khraw tam na ki blei baroh; ka jingieit jong u ka neh bymjukut.

³ To ainguh ïa uba khlaiñbor tam na ki kynrad baroh; ka jingieit jong u ka neh bymjukut.

⁴ Tang ma u hi u leh ïa ki kambah bakhraw; ka jingieit jong u ka neh bymjukut.

⁵ Da ka jingstad jong u, u la thaw ïa ki bneng; ka jingieit jong u ka neh bymjukut;

⁶ u la tei ïa ka pyrthei halor ki um bajylliew; ka jingieit jong u ka neh bymjukut.

⁷ U la thaw ïa ka sngi bad ïa u bnai; ka jingieit jong u ka neh bymjukut;

⁸ ïa ka sngi ban synshar mynsngi; ka jingieit jong u ka neh bymjukut;

⁹ ïa u bnai bad ki khlur ban synshar halor ka miet; ka jingieit jong u ka neh bymjukut.

¹⁰ U la pynïap ïa ki khun shynrang nyngkong jong ki nong Ijipt; ka jingieit jong u ka neh bymjukut.

¹¹ U la ïalam noh ïa ki paid Israel na Ijipt; ka jingieit jong u ka neh bymjukut;

¹² da ka kti bakhlaiñ jong u, ka ksang'ti badonbor jong u; ka jingieit jong u ka neh bymjukut.

¹³ U la kad arliang ïa ka Duriaw basaw, ka jingieit jong u ka neh bymjukut;

¹⁴ u la ïalam ïa la ki briew lyngba jong ka, ka jingieit jong u ka neh bymjukut;

¹⁵ hynrei u la pynngam jyllop ïa u syiem ka Ijipt bad ïa ka kynhun shipai jong u; ka jingieit jong u ka neh bymjukut.

¹⁶ U la ïalam ïa la ki briew lyngba ka ri shyiap; ka jingieit jong u ka neh bymjukut.

¹⁷ U la pynïap ïa ki syiem kiba donbor; ka jingieit jong u ka neh bymjukut;

¹⁸ u la pynïap ïa ki syiem kiba pawnam; ka jingieit jong u ka neh bymjukut;

¹⁹ ïa u Sihon, u syiem ki Amor; ka jingieit jong u ka neh bymjukut;

²⁰ bad ïa u Og, u syiem ka Bashan; ka jingieit jong u ka neh bymjukut.

²¹ U la ai ïa ki ri jong ki ha ki briew jong u; ka jingieit jong u ka neh bymjukut;

²² u la ai ïa ki ha u Israel, u shakri jong u; ka jingieit jong u ka neh bymjukut.

²³ Um shym la klet ïa ngi mynba ngi la shahjop; ka jingieit jong u ka neh bymjukut;

²⁴ u la pyllait ïa ngi na ki nongshun jong ngi; ka jingieit jong u ka neh bymjukut.

²⁵ U ai jingbam ïa ki jingthaw ba-im baroh; ka jingieit jong u ka neh bymjukut.

²⁶ To ainguh ïa U Blei jong ka bneng; ka jingieit jong u ka neh bymjukut.