SALM 135 - Khasi CL Bible (BSI)

Ka jingrwai ïaroh

¹ To ïaroh ïa U Trai! To ïaroh ïa ka kyrteng jong u, phi ki shakri jong U Trai,

² kiba ïeng ha ka ïing jong U Trai, ha ka Templ jong U Blei jong ngi.

³ To ïaroh ïa U Trai, namar u long uba bha; to rwai ki jingïaroh ïa ka kyrteng jong u, namar u long uba bha sbun.

⁴ U la jied ïa u Jakob na ka bynta ïa lade, ïa ki paid Israel na ka bynta jong u hi.

⁵ Nga tip ba U Trai u long uba khraw, kham khraw ban ïa ki blei baroh.

⁶ U leh ïa kat kaba u mon ha bneng bad ha pyrthei, ha ki duriaw bad ha ki jingjylliew bashapoh.

⁷ U wanrah ïa ki lyoh 'erïong na kiba kut ka pyrthei; u pynlong leilieh ïa ki 'erïong, bad u wanrah shabar ïa ka lyer na la ka jaka buh.

⁸ Ha Ijipt u la pynïap ïa baroh kiba la kha nyngkong na ki briew bad na ki mrad kumjuh.

⁹ Hangta u la leh ïa ki kambah bad ki kamphylla ban pynshitom ïa u syiem bad ïa ki rangbah synshar jong u baroh.

¹⁰ U la pynjot bun ki jaitbynriew bad u la pynïap ïa ki syiem kiba khrawbor:

¹¹ ïa u Sihon, u syiem ki Amor, ïa u Og, u syiem ka Bashan, bad ïa baroh ki syiem ha Kanaan.

¹² U la ai ïa ki ri jong ki sha ki briew jong u; u la ai ïa ki ha ki Israel.

¹³ A Trai, ïa me yn pynbna borabor kum U Blei; ki pateng bynriew baroh kin kynmaw ïa me.

¹⁴ U Trai un kyrshan ïa la ki briew; un sngewsynei ïa la ki shakri.

¹⁵ Ïa ki blei jong ki jaitbynriew la shna da ka rupa bad ka ksiar; la pynwandur da ki kti ki briew.

¹⁶ Ki don ki shyntur, hynrei kim lah ban kren, bad ki khmat, hynrei kim lah ban ïohi.

¹⁷ Ki don ki shkor, hynrei kim lah ban ïohsngew; kim lah wat ban pynhiar mynsiem.

¹⁸ To ai ba baroh kiba la thaw ïa ki bad kiba shaniah ha ki kin kylla long kum ki bleithaw ba ki la shna!

¹⁹ To ïaroh ïa U Trai, phi ki paid Israel; to ïaroh ïa u, phi ki lyngdoh jong U Blei!

²⁰ To ïaroh ïa U Trai, phi ki Lebi; to ïaroh ïa u, phi baroh kiba mane ïa U!

²¹ To ïaroh ïa U Trai ha Seïon, ha Jerusalem, ka ïingshong jong u. To ïaroh ïa U Trai!