SALM 132 - Khasi CL Bible (BSI)

Kaba ïaroh ïa ka Templ

¹ A Trai, wat nym klet ïa u Dabid bad ïa ki jingeh baroh kiba u la shah.

² To kynmaw, A Trai, ïa kaei kaba u la kular, ka jingsmai kaba u la pynlong ha me, U Blei Badonbor jong u Jakob:

³ “Ngan ym leit sha ïing lane kiew ha ka jingthiah;

⁴ Ngan nym shongthait ne ïohthiah,

⁵ haduh ba ngan da ïoh pynbiang ka jaka ïa U Trai, ka jaka shong ïa U Blei Bakhlaiñbor jong u Jakob.”

⁶ Ha Bethlehem ngi la ïohsngew shaphang ka Synduk ka Jutang, bad ngi la shem ïa ka ha ki madan ka Jearim.

⁷ Ngi la ong, “Ïa ngin ïaleit sha ka ïing U Trai; to ngin mane ha khmat ka khet jong u!”

⁸ To wan sha ka Templ, A Trai, lem bad ka Synduk ka Jutang, ka dak jong ka bor jong me, bad sah hangne junom.

⁹ Ai ba ki lyngdoh jong me kin leh borabor ïa kaei kaba dei; ai ba ki briew jong me kin risa da ka jingkmen!

¹⁰ Me la pynlong ïa ka jingkular ha u Dabid u shakri jong me; wat ym kyntait ïa u syiem ba la jied jong me, A Trai.

¹¹ Me la pynlong ïa ka jingkular bakyntang ha u Dabid — ka jingkular kaba men ym shim pat: “Ngan pynlong syiem ïa uwei na ki khun shynrang jong me, bad un synshar hadien jong me.

¹² Lada ki khun jong me ki sumar ïa ka jutang jong nga bad ïa ki hukum ba nga ai ïa ki, ki khun shynrang jong ki ruh, kin ïoh long ki syiem ha ki por baroh hadien jong me.”

¹³ U Trai u la jied ïa ka Seïon; u kwah ba kan long ka jaka shong jong u:

¹⁴ “Hangne keiñ ka jaka ba ngan shong junom; hangne keiñ ka jaka ba nga kwah ban synshar.

¹⁵ Ngan kyrkhu kyrhai ïa ka Seïon da kiei kiei baroh kiba ka donkam; ngan pynkdang ïa kiba duk jong ka da ka jingbam.

¹⁶ Ngan kyrkhu ïa ki lyngdoh jong ka ha kiei kiei baroh ba ki leh, bad ki briew jong ka kin rwai bad risa da ka jingkmen.

¹⁷ Hangne ngan pynlong u syiem uba khraw ïa uwei na ki khun ki ksiew u Dabid; hangne ngan pynneh ïa ka jingsynshar jong u syiem ba la jied jong nga.

¹⁸ Ngan tap ïa ki nongshun jong u da ka jinglehrain, hynrei ka hima jong u kan roi kan par bad tyngshaiñ.”