SALM 13 - Khasi CL Bible (BSI)Ka jingduwai ban ïoh jingïarap 1 Sa katno pat ba men klet ïa nga, A Trai? Hato shi junom? Sa katno pat ba men buhrieh ïa lade na nga? 2 Sa katno nga dei ban shah jynjar? Sa katno ka jingsngewsih kan pyndap ïa ka dohnud jong nga mynsngi bad mynmiet? Sa katno ki nongshun jong nga kin lehkmen halor jong nga? 3 To khmih ïa nga, A Trai U Blei jong nga, bad to jubab ïa nga. Pynïoh pat ka jingkhlaiñ jong nga; wat ai ba ngan ïap. 4 Wat shah ba ki nongshun jong nga kin ong, “Ngi la jop ïa u.” Wat shah ïa ki ban kynkok halor ka jingkyllon jong nga. 5 Nga shaniah ha ka jingieit baneh jong me; ngan sngewkmen, namar men pyllait ïa nga. 6 Ngan rwai ha me, A Trai, namar me la long uba bha ïa nga. |
Khasi CL Bible
Copyright © Bible Society of India, 2016.
Used by permission. All rights reserved worldwide.
Bible Society of India