SALM 129 - Khasi CL Bible (BSI)

Ka jingduwai pyrshah ïa ki nongshun jong ka Israel

¹ Ko Israel, to ïathuh ïa ngi haduh katno ki nongshun jong pha ki la pynshitom sat ïa pha naduh mynba pha dang samla.

² “Naduh mynba nga dang samla, ki nongshun jong nga ki la pynshitom sat ïa nga, hynrei kim shym la jop ïa nga.

³ Ki ot jylliew ïa ki jingmong ha ka met jong nga; bad ki pynlong ïa ka kum ka lyngkha ba la lur.

⁴ Hynrei U Trai, u long uta uba hok, u pyllaitluid ïa nga na ka jinglongmraw.”

⁵ Ai ba baroh kiba isih ïa ka Seïon kin shahjop bad shah beh noh.

⁶ Ai ba ki baroh kin long kum u phlang uba mih halor ki tnum ïing, uba ïapstai shuwa ba un san;

⁷ yn ym don uba lum ïa u, lane ba kit ïa u ha ki song,

⁸ Yn ym don mano mano ba ïaid lynti u ban ong, “To U Trai un kyrkhu ïa phi! Ngi kyrkhu ïa phi ha ka kyrteng jong U Trai!”