SALM 127 - Khasi CL Bible (BSI)

Kaba ïaroh ïa ka jingbha jong U Blei

¹ Lada U Trai um tei ïa ka ïing, ka jingtrei ki nongtei ka long lehnoh-ei; lada U Trai um ïada ïa ka nongbah, ka long lehnoh-ei ïa ki nongap ban ap phira.

² Ka long lehnoh-ei ban trei shitom katta katta na ka bynta ka jingim, ban khie dang step bad ban thiah miet. Naba U Trai u pyndap ïa kita kiba u ieit; katba ki dang ïohthiah.

³ Ki khun ki long ka jingai sngewbha na U Trai; ki long shisha ka jingkyrkhu.

⁴ Ki khun shynrang ba u briew u don haba u dang samla ki long kum ki khnam ha ka kti u nongïaleh thma.

⁵ Suk uta u briew uba don shibun kum kita ki khnam. Un ym shah rem haba u ïakynduh bad ki nongshun jong u ha ka jaka jong ka jingbishar.