SALM 124 - Khasi CL Bible (BSI)

U Blei u nongïada ïa la ki briew

¹ Kaei ka ban jia lada U Trai um shym la don ha ka liang jong ngi? To jubab, ko Israel!

² “Lymda U Trai u don ha ka liang jong ngi, haba ki nongshun ki tur ïaleh ïa ngi,

³ te kin jin da la nguid im ïa ngi, ha ki jingbitar lep jong ki pyrshah ïa ngi;

⁴ te ka jingshlei um kan jin da la kit noh ïa ngi, ka um kan jin da la tyllep ïa ngi;

⁵ ka lat lat bastet kan jin da la pynngam jyllop ïa ngi”.

⁶ To ngin ainguh ïa U Trai, u bym shym la shah ïa ki nongshun jong ngi ban pynjot ïa ngi.

⁷ Ngi la lait im kum ka sim na ka jingriam u nongriam sim; ka jingriam ka la pra, bad ngi la laitluid!

⁸ Ka jingïarap jong ngi ka wan na U Trai, uba la thaw ïa ka bneng bad ïa ka khyndew.