SALM 12 - Khasi CL Bible (BSI)

Ka jingduwai ban ïoh jingïarap

¹ Ïarap ïa ngi, A Trai! Ym don shuh u briew uba bha uba dang sah; ym lah shuh ban shem ïa ki briew kiba hok.

² Baroh na ki, ki lamler iwei ïa iwei pat; ki shukor iwei ïa iwei pat da ki kyntien pynroh.

³ To pynsngap jar ïa ki thylliej pynroh, A Trai! To set noh khop ïa ki shyntur basngewmeng kiba ong,

⁴ “Da ki kyntien jong ngi, ngi ïoh ïa kaei kaba ngi kwah. Ngin kren ïa kaei kaba ngi mon, bad ym don mano mano ba lah ban pynsangeh ïa ngi.”

⁵ “Hynrei mynta ngan wan,” ong U Trai, “namar ïa kiba kyrduh la banbeiñ bad kiba shah pynshitom beiñ ki ud ha ka jingshitom. Ngan ai ha ki ïa ka jingshngain kaba ki thrang eh.”

⁶ Ki jingkular jong U Trai ki long kiba lah ban shaniah; ki long kiba shisha kum ka rupa ba la phrang hynñiew sien ha ka shlem.

^7-8 Ki riewbymman ki don kylleng, uwei pa uwei baroh u ïaroh ïa kaei kaba sniew. To ïai sumar ïa ngi, A Trai, bad ri ïa ngi na kiba kum kine ki briew.