SALM 118 - Khasi CL Bible (BSI)

Ka jingduwai ainguh na ka bynta ka jingjop

¹ To ainguh ïa U Trai, naba u long uba bha; bad ka jingieit jong u ka neh bymjukut.

² Ai ba ki paid Israel kin ong, “Ka jingieit jong u ka neh bymjukut.”

³ Ai ba ki lyngdoh jong U Blei kin ong, “Ka jingieit jong u ka neh bymjukut.”

⁴ Ai ba baroh kiba mane ïa u kin ong, “Ka jingieit jong u ka neh bymjukut.”

⁵ Ha ka jingkordit jong nga, nga la khot kyrpad ïa U Trai; u la jubab ïa nga bad u la pyllait ïa nga.

⁶ U Trai u don bad nga, ngan ym sheptieng; u briew un lah leh aïu ïa nga?

⁷ U dei U Trai uba ïarap ïa nga; bad ngan ïohi ba ki nongshun jong nga ki shahjop.

⁸ Ka kham bha ban shaniah ha U Trai ban ïa kaba shaniah ha u briew.

⁹ Ka kham bha ban shaniah ha U Trai ban ïa kaba shaniah ha ki nongïalam ba kynja briew.

¹⁰ Shibun ki nongshun ki la don sawdong jong nga; hynrei nga la pynjot ïa ki da ka bor jong U Trai!

¹¹ Ki la don sawdong jong nga ha ki liang baroh; hynrei nga la pynjot ïa ki da ka bor jong U Trai!

¹² Ki la ïaboi sawdong jong nga kum ki ngap, hynrei ki la ing duh kloi kum ka ding hapdeng ki shiah; da ka bor ka jong U Trai nga la pynjot ïa ki.

¹³ La tur ïaleh jur ïa nga bad nga la shahjop, hynrei U Trai u la ïarap ïa nga,

¹⁴ U Trai u la pynlong ïa nga uba donbor bad uba khlaiñ; u la pynim ïa nga.

¹⁵ To shahshkor ïa ki jingpyrta da kaba kmen ïa ka jingjop ha ki ïingjaiñ jong ki briew jong U Blei: “Ka borbah jong U Trai ka la leh ïa ka!

¹⁶ Ka bor jong u ka la wanrah jingjop ïa ngi — ka borbah jong u ha ka thma!”

¹⁷ Ngan ym ïap; hynrei ngan im bad ngan pynbna ïa kaei kaba U Trai u la leh.

¹⁸ U la pynshitom jur ïa nga, hynrei um shym la shah ïa nga ban ïap.

¹⁹ To plie ïa nga ïa ki khyrdop jong ka Templ; ngan leit rung shapoh bad ainguh ïa U Trai!

²⁰ Kane ka dei ka khyrdop jong U Trai; tang kiba hok ki lah ban rung shapoh.

²¹ Nga ïaroh ïa me, A Trai, namar me la ïohsngew ïa nga, bad me la ai ka jingjop ïa nga.

²² U maw uba ki nongtei ki la kyntait kum u bymdondor u la jia long uba donkam eh na baroh.

²³ Ïa kane la leh da U Trai; A katno ka long kaba itynnat ban khmih!

²⁴ Kane ka dei ka sngi jong ka jingjop jong U Trai; to ngin ïakmen, to ngin ïalehkmen!

²⁵ To pynim ïa ngi, A Trai, to pynim ïa ngi! to ai ha ngi ïa ka jingjop, A Trai!

²⁶ To U Blei un kyrkhu ïa uta uba wan ha ka kyrteng jong U Trai! Na ka Templ jong U Trai ngi kyrkhu ïa me.

²⁷ U Trai u long U Blei; u la long uba bha ïa ngi. Lem bad ki tnat dieng ha ki kti jong phi, to sdang ïa ka Jingkhawai Niam bad ïaid sawdong ïa ka duwan.

²⁸ Me long U Blei jong nga, bad nga ainguh ïa me; ngan pynbna ïa ka jingkhraw jong me.

²⁹ To ainguh ïa U Trai, naba u long uba bha; bad ka jingieit jong u ka neh bymjukut.