SALM 116 - Khasi CL Bible (BSI)

U briew uba la lait im na ka jingïap u ïaroh ïa U Blei

¹ Nga ieit ïa U Trai, namar u sngew ïa nga, u shahshkor ïa ki jingduwai jong nga.

² U shahshkor ïa nga, man ka por ba nga khot kyrpad ïa u.

³ Ka jingma jong ka jingïap ka la ker sawdong jong nga; ki jingngiew jong ka jingtep ki la hajan ïa nga; la pyndap ïa nga da ka jingtieng bad ka jingkhuslai.

⁴ Te nga la khot kyrpad ïa U Trai, “Nga kyrpad ïa me, A Trai, to pynim ïa nga!”

⁵ U Trai u long uba dap da ka jingisynei bad uba bha; U Blei jong ngi u long uba sngewlem.

⁶ U Trai u ïada ïa ki bym don jingïarap; haba nga la don ha ka jingma, u la pyllait im ïa nga.

⁷ To sngewskhem, ko mynsiem jong nga, namar U Trai u la lehbha ïa nga.

⁸ U Trai u la pyllait im ïa nga na ka jingïap, u la pynsangeh ïa ki ummat jong nga, bad u la sumar ïa nga na ka jingshahjop.

⁹ Bad kumta nga la ïaid ha ka jingdon ryngkat jong U Trai ha ka pyrthei jong kiba im.

¹⁰ Nga la ïaineh ha ka jingngeit, wat haba nga ong, “La pynlwet khoit ïa nga,”

¹¹ wat haba nga la sheptieng bad nga ong, “Ym don uwei ruh ïa uba lah ban shaniah.”

¹² Kaei nga lah ban ai ïa U Trai namar ka jinglehbha jong u baroh ïa nga?

¹³ Ngan wallam ka jingainguh waiñ sha U Trai, ban ainguh ïa u namar ka jingpynim ïa nga.

¹⁴ Ha ka jingïaseng lang jong ki briew jong u baroh ngan ai ha u ïa kaei kaba nga la kular.

¹⁵ Katno kaba pangnud ka long ïa U Trai haba iwei na ki briew jong u i ïap!

¹⁶ Nga long u shakri jong me, ko Trai; nga shakri ïa me, kumba ka kmie jong nga ka la leh. Me la pyllait im ïa nga na ka jingïap.

¹⁷ Ngan ai ha me ka jingkñia ainguh bad ai ka jingduwai sha me.

^18-19 Ha ka jingïaseng lang jong ki briew jong me baroh, ha ka jaka kyntang jong ka Templ jong me ha Jerusalem, ngan ai ha me ïa kaei kaba nga la kular. A to ïaroh ïa U Trai!