SALM 115 - Khasi CL Bible (BSI)

U Blei uba shisha ba tang uwei

¹ Tang sha me hi, A Trai, tang sha me hi! bad ym sha ngi, ba dei ban ai ïa ka burom namar ka jingieit baneh bad ka jingïaineh jong me.

² Balei ba ki jaitbynriew kin kylli ïa ngi, “Hangno U Blei jong phi?”

³ U Blei jong ngi u don ha bneng; u leh ïa kano kano kaba u mon.

⁴ Ïa ki blei jong ki la thaw da ka rupa bad ka ksiar, ba la pynwandur da ki kti jong ki briew.

⁵ Ki don ki shyntur, hynrei kim lah ban kren; bad ki khmat, hynrei kim lah ban ïohi.

⁶ Ki don ki shkor, hynrei kim lah ban ïohsngew; bad ki khmut, hynrei kim lah ban iw.

⁷ Ki don ki kti, hynrei kim lah ban tba, bad ki kjat, hynrei kim lah ban ïaid; kim lah ban pynmih sur jingsawa.

⁸ Ai ba kito baroh kiba thaw ïa ki bad kiba shaniah ha ki kin long kum ki bleithaw kiba ki la thaw.

⁹ To shaniah ha U Trai, phi ki paid Israel. U ïarap ïa phi bad u ïada ïa phi.

¹⁰ To shaniah ha U Trai, phi ki lyngdoh jong U Blei. U ïarap ïa phi bad u ïada ïa phi.

¹¹ To shaniah ha U Trai, phi baroh kiba mane ïa u. U ïarap ïa phi bad u ïada ïa phi.

¹² U Trai u kynmaw ïa ngi, bad un kyrkhu ïa ngi; un kyrkhu ïa ki paid Israel bad ïa baroh ki lyngdoh jong U Blei.

¹³ Un kyrkhu ïa uwei pa uwei uba pyndonburom ïa u, kiba khraw bad kiba rit kumjuh.

¹⁴ To U Trai un ai ki khun ha phi — ïa phi bad ïa ki khun ki ksiew jong phi!

¹⁵ To phin long kiba la kyrkhu da U Trai, uba la thaw ïa ka bneng bad ïa ka pyrthei!

¹⁶ Ka bneng ka long ka jong U Trai hi, hynrei u ai ïa ka pyrthei ha u bynriew.

¹⁷ Ïa U Trai yn ym ïaroh da kiba ïap, da kino kino kiba leit hiar sha ka ri ka jingsngap jar.

¹⁸ Hynrei ma ngi, kiba im, ngin ainguh ïa u mynta bad sha bymjukut. A to ïaroh ïa U Trai!