SALM 113 - Khasi CL Bible (BSI)

Kaba ïaroh ïa ka jingbha jong U Trai

¹ A to ïaroh ïa U Trai! Phi ki shakri jong U Trai; to ïaroh ïa ka kyrteng jong u!

² To ai ba yn ïaroh ïa ka kyrteng jong u mynta bad sha bymjukut!

³ Naduh mihngi shaduh sepngi A to ïaroh ïa ka kyrteng jong U Trai!

⁴ U Trai u synshar halor ki jaitbynriew baroh; ka burom jong u ka don halor ki bneng.

⁵ Ym don uno uno uba kum U Trai U Blei jong ngi. U shong ha kiba kynjang shajrong,

⁶ hynrei u dem shapoh ban peit ïa ki bneng bad ïa ka khyndew.

⁷ U kyntiew ïa kiba duk na ka khyndew; u rah ïa kiba kyrduh na ka jingsangsot jong ki,

⁸ bad u pynlong ïa ki, ki paralok jong ki khun syiem shynrang, ki khun syiem shynrang jong ki briew jong u.

⁹ U pyndonburom ïa ka tnga ka bym don khun ha ka ïingshong jong ka; u pynkmen ïa ka da kaba ai ki khun ha ka. A to ïaroh ïa U Trai!