SALM 110 - Khasi CL Bible (BSI)

U Trai bad u syiem ba la jied jong u

¹ U Trai u la ong ha u trai jong nga, u syiem, “Shong hangne ha ka liang kamon jong nga haduh ba ngan da pyndem ïa ki nongshun jong me hapoh ki kjat jong me.”

² Na Seïon U Trai un pynïar ïa ka bor syiem jong me. “To synshar halor ki nongshun jong me,” u ong.

³ Ha ka sngi ba me ïaleh ïa ki nongshun jong me, ki briew jong me kin long ki nongïaleh da ka mon sngewbha. Kum ki umjer jong ka step phyrngab ki samla shynrang jong me kin wan sha me ha ki lum bakyntang.

⁴ U Trai u la pynlong ïa ka jingkular bakyntang bad un ym kylla pat na kata: “Men long u lyngdoh junom ha ka rukom long lyngdoh u Melkhisedek.”

⁵ U Trai u don ha ka liang kamon jong me; haba u bitar, un jop ïa ki syiem,

⁶ Un ai ïa ka jingbishar halor ki jaitbynriew bad un pyndap ïa ka madan thma da ki metïap; un jop ïa ki syiem baroh jong ka pyrthei.

⁷ U syiem un dih na ka wahduid kaba harud lynti, bad ha ka jingkhlaiñ, un ïeng da ka jingjop.