SALM 11 - Khasi CL Bible (BSI)

Ka jingshaniah ha U Trai

¹ Nga shaniah ha U Trai na ka bynta ka jingshngain. Phi long kiba bieit ban ong ha nga, “To her noh kum ka sim sha ki lumbah;

² naba ki bymman ki la sei la ki ryntieh bad ki la thew ïa la ki khnam ban siat na kaba rieh ïa ki briew kiba bha.

³ Ym don kano kano kaba u briew uba bha u lah ban leh haba kiei kiei baroh ki pait ki pra.”

⁴ U Trai u don ha ka Templ bakhuid jong u; u don ka khet jong u ha bneng; u khmih ïa ki briew hangno hangno haba ki don, bad u tip ki ïaleh aïu.

⁵ U khmih bniah ïa uba hok bad ïa u bymman kumjuh, ïa uba tamsneng u isih da ka dohnud jong u baroh.

⁶ U pynhap ki rnga barhem bad ïa u kyndok bameh ding halor ki bymman; u pynshitom ïa ki da ki lyer khluit.

⁷ U Trai u long uba hok, bad u ieit ïa ki kam babha; kito kiba leh ïa ki kin im ha ka jingdon ryngkat jong u.