SALM 109 - Khasi CL Bible (BSI)

Ka jingmudui u briew hapdeng ka jingjynjar

¹ Nga ïaroh ïa me, A Blei; to wat sngap jar!

² Ki briew bymman bad kiba shukor ki la ïaleh pyrshah ïa nga. Ki kren shukor shaphang jong nga

³ bad ki kren ïa kiei kiei kiba sniew shaphang jong nga, ki pyrshah ïa nga khlem daw.

⁴ Ki pyrshah ïa nga, wat la nga ieit ïa ki bad ba nga la duwai na ka bynta jong ki.

⁵ Ki siew kylliang ïa nga da kaba sniew na ka bynta kaba bha bad da ka jingisih na ka bynta ka jingieit.

⁶ To jied ïa uno uno u nongbishar uba bamsap ban bishar ïa u nongshun jong nga, bad to ai ba uwei na ki nongshun jong u hi un pharep ïa u.

⁷ Ai un shah bishar bad ba yn shem ba u long uba la shah rai pynrem; ai ba wat ïa ka jingduwai jong u, yn ñiew kum ka kam sniew!

⁸ Ai ba ka jingim jong u kan kut noh shen; ai ba uwei pat u briew un shim noh ïa ka kam jong u!

⁹ Ai ba ki khun jong u kin kylla long ki khunswet, bad ka tnga jong u kan long riewkynthei!

¹⁰ Ai ba ki khun jong u kin kylla long ki nongkhrong khlem ïing khlem sem; ai ba kin shah beh noh na ki jaka ba la jot la pra ha kaba ki shong ki sah!

¹¹ Ai ba ki nongai ram kin shim noh ïa ka jingdon jingem jong u baroh, bad ai ba ki nongwei kin ïoh ïa baroh kaei kaei kaba u la trei.

¹² Ai ba yn ym don uno uno u ban lehsbun ïa u lane sumar ïa ki khunswet ba u la iehnoh shadien jong u.

¹³ Ai ba baroh ki khun ki ksiew jong u kin ïap noh, bad ai ba ïa ka kyrteng jong u yn klet noh ha ka pateng kaba bud.

¹⁴ Ai ba U Trai un kynmaw ïa kaba sniew jong ki kpa tymmen jong u bad ba yn ym map shuh ïa ki pop ka kmie jong u.

¹⁵ Ai ba U Trai un kynmaw borabor ïa ki pop jong ki, hynrei ai ba ïa ki hi yn klet noh baroh phar!

¹⁶ Uta u briew um ju pyrkhat ban lehsbun; u pynshitom beiñ bad u pynïap ïa kiba duk, ïa kiba kyrduh bad ïa ki bym don jingïarap shuh.

¹⁷ U la ieit ban tim — ai ba yn tim ïa u! U la isih ban ai ki jingkyrkhu — ai ba yn ym don mano mano u ban kyrkhu ïa u!

¹⁸ Ka jingtim jong u ka la long tynrai kumba u riam u beit ïa lade; ai ba ki jingtim jong u hi kin ngam hapoh ka met jong u kum ka um bad shapoh ki shyieng jong u kum ka umphniang!

¹⁹ Ai ba kin tap ïa u kum ki jaiñ bad ba yn ïai don sawdong ïa u kum u panpoh!

²⁰ A Trai, to pynshitom ïa ki nongshun jong nga ha kata ka rukom — ïa kito kiba ong kum ïa kita kiei kiei kiba sniew pyrshah ïa nga!

²¹ Hynrei, A Trai Nongsynshar jong nga, to ïarap ïa nga kumba me la kular, bad pyllait ïa nga namar ka jingbha jong ka jingieit jong me.

²² Nga long uba duk bad uba kyrduh; nga mong naduh kiba jylliew eh ka dohnud jong nga.

²³ Kum ka syrngiew ha ka por janmiet nga long kumba ngan sa jah noh; ïa nga la pyrsad kum ïa u khñiang.

²⁴ Ki khohsiew jong nga ki tlot na ka jingduna jingbam; ngam long ei ei shuh hynrei sa tang ka snep bad ki shyieng.

²⁵ Haba ki briew ki ïohi ïa nga, ki rkhie ïa nga; ki pynkhih ïa la ki khlieh ha ka jingkrenbeiñ.

²⁶ To ïarap ïa nga, A Trai U Blei jong nga; namar ka jingieit baneh jong me, pynim ïa nga!

²⁷ Pynlong ïa ki nongshun jong nga ba kin tip ba me dei uta uba pynim ïa nga.

²⁸ Ki lah ban tim ïa nga, hynrei men kyrkhu ïa nga. Ai ba ki nongpynshitom beiñ jong nga kin shahjop, bad to ai ba ma nga, u shakri jong me, ngan kmen.

²⁹ Ai ba ïa ki nongshun jong nga yn tap da ka jingjahburom; ai ba ka jinglehrain jong ki kan long kum ka jingkup jaiñ jong ki.

³⁰ Ngan pynjam ïa ki jingsngewnguh sha U Trai; ngan ïaroh ïa u ha ka jingïaseng lang u paidbah,

³¹ namar u kyrshan ïa u briew uba duk bad u pynim ïa u na kito kiba pynrem ïa u sha ka jingïap.