SALM 108 - Khasi CL Bible (BSI)

Ka jingduwai ban ïoh jingïarap pyrshah ïa ki nongshun

¹ Nga don ka jingshaniah tylli, A Blei! Ngan rwai bad ïaroh ïa me! To khie noh, ko ka mynsiem jong nga!

² To khie noh, ko ka duitara bad ka jingtem ksai! Ngan kyrsiew ïa ka sngi.

³ Ngan ainguh ïa me, A Trai, hapdeng ki hima. Ngan ïaroh ïa me hapdeng ki jaitbynriew.

⁴ Ka jingieit baneh jong me ka la poi sha ki bneng shajrong; ka jingïaineh jong me ka la kot sha ki sahit bneng.

⁵ To pyn-i ïa ka jingkhraw jong me ha ka sahit bneng, A Blei, bad ka burom jong me halor ka pyrthei baroh.

⁶ To pynim ïa ngi da ka borbah jong me; to jubab ïa ka jingduwai jong nga, khnang ba ïa ki briew kiba me ieit yn pyllait im.

⁷ Na ka jaka kyntang jong u, U Blei u la ong, “Ha ka jingjop ngan phiah ïa ka Shekhem bad ïasam ïa ka Them Sukkoth ha ki briew jong nga.

⁸ Ka Gilead ka dei ka jong nga, bad ka Manasseh ruh; ka Ephraim ka dei ka jingda khlieh jong nga bad ka Judah ka dei u diengsynshar syiem jong nga.

⁹ Hynrei ngan pyndonkam ïa ka Moab kum ka jaka sait kti jong nga bad ngan pashat ïa ki juti jong nga halor ka Edom, kum ka dak ba nga long trai ïa ka. Ngan pyrta ha ka jingjop halor ki Philistia.”

¹⁰ Mano, A Blei, u ban rah ïa nga sha ka nongbah ba la ker kynroh? Mano ban ïalam ïa nga sha Edom?

¹¹ Hato me la kyntait shisha ïa ngi? Hato men ym ïaid ryngkat bad ki kynhun shipai jong ngi?

¹² To ïarap ïa ngi pyrshah ïa u nongshun; ka jingïarap ba kynja briew kam don jingmyntoi.

¹³ Ryngkat bad U Blei ha ka liang jong ngi, ngin ïoh jingjop; un jop ïa ki nongshun jong ngi.