Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

SALM 107 - Khasi CL Bible (BSI)


Ka Kitab Kaba San ( Salm. 107—150 ) Ka jingïaroh ïa ka jingbha U Blei

1 “To ainguh ïa U Trai, namar u long uba bha; ka jingieit jong u ka long bymjukut!”

2 To ïai-ong ïa kine ki ktien ha ka jingïaroh ïa U Trai, ma phi baroh ïa kiba u la pynim.

3 U la pyllait im ïa phi na ki nongshun jong phi bad u la wallam pat ïa phi na ki ri nongwei, na mihngi bad sepngi, na shatei bad shathie.

4 Katto katne ki la sakma ha ka ri shyiap bym don lynti bad kim shym la shem ïa ka lynti jong ki sha ka nongbah ban shong ban sah hangta.

5 Ki la thngan bad sliang bad ki la duh baroh ka jingkyrmen.

6 Te ha ka jingjynjar jong ki, ki la khot kyrpad ïa U Trai, bad u la pynim ïa ki na ka jingjynjar jong ki.

7 U la ïalam ïa ki na ka lynti kaba beit sha ka nongbah ha kaba ki lah ban shong ban sah.

8 Ki dei ban sngewnguh ïa U Trai na ka bynta ka jingieit baneh jong u, na ka bynta kiei kiei kiba phylla kiba u la leh ïa ki.

9 U la pynhun ïa kito kiba sliang bad pyndap ïa kiba thngan da kiei kiei kiba bha.

10 Katto katne ki la im ha ka jingshaïong bad ka jingdum, ki koidi kiba shahshitom ha ki kynjri,

11 namar ki la ïaleh pyrshah ïa ki hukum jong U Blei Badonbor Baroh bad ki la kyntait ïa ki jingbthah jong u.

12 Ki la duh bor noh na ka jingtrei shitom; kumba kin kyllon noh, bad ym don ba ïarap.

13 Te ha ka jingjynjar jong ki, ki khot kyrpad ïa U Trai, bad u pynim ïa ki na ka jingjynjar jong ki.

14 U wallam ïa ki na ka jingshaïong bad ka jingdum jong ki bad bthat lyngkhot lyngkhai ïa ki kynjri jong ki.

15 Ki dei ban sngewnguh ïa U Trai na ka bynta ka jingieit baneh jong u, na ka bynta kiei kiei kiba phylla kiba u la leh na ka bynta jong ki.

16 U la pynpait ïa ki jingkhang rnong bad pynpra ïa ki nar kiba ker.

17 Katto katne ki la long kiba bieit, ki shahshitom namar ki pop jong ki bad namar ka jingsniew jong ki;

18 kim lah ban peit ïa ka jingbam bad ki la jan ban ïap.

19 Te ha ka jingjynjar jong ki, ki khot kyrpad ïa U Trai, bad u pyllait ïa ki na ka jingjynjar jong ki.

20 U pynkhiah ïa ki da ka hukum jong u bad pyllait im ïa ki na ka jingtep.

21 Ki dei ban sngewnguh ïa U Trai na ka bynta ka jingieit baneh jong u, na ka bynta kiei kiei kiba phylla kiba u la leh ïa ki.

22 Ki dei ban sngewnguh ïa u da ki jingkñia, bad da ki jingrwai jong ka jingkmen ki dei ban ïathuh ïa baroh kaba u la leh.

23 Katto katne ki leit da ka liengbah halor ka duriaw-bah, ki trei na ka bynta ka jingim jong ki ha ki duriaw-rit.

24 Ki la ïohi ïa kaei kaba U Trai u lah ban leh, ki kam baphylla jong u ha ki duriaw-rit.

25 U hukum, bad ka lyer bah ka sdang ban beh bad pynmih ki jingat phyllung.

26 Ki liengbah ki shah kynting sha suiñ bad ki ngam shapoh ki jingjylliew. Hapdeng kum kata ka jingma ki briew ki duh noh ïa ka jingshlur;

27 ki jynthut bad ki ïaid sheng sheng kum ki briew kiba buaid — baroh ka jingtbit jong ki ka la lehnoh-ei.

28 Te ha ka jingjynjar jong ki, ki khot kyrpad ïa U Trai, bad u pynim ïa ki na ka jingjynjar jong ki.

29 U pynjai jai ïa ka 'erïong kaba jur, bad ki jingat phyllung ki long jai jai.

30 Ki la kmen namar kata ka jingjai jai, bad u pyllait ïa ki na ka jingma bad wallam pat ïa ki sha ka kadlieng kaba ki kwah.

31 Ki dei ban sngewnguh ïa U Trai na ka bynta ka jingieit baneh jong u, na ka bynta kiei kiei kiba phylla kiba u la leh ïa ki.

32 Ki dei ban pynbna ïa ka jingkhraw jong u ha ka jingïalang u paidbah bad ïaroh ïa u ha ka jingïalang ki nongïalam.

33 U Trai u pynlong ïa ki wah ban rngad lut bad pynsangeh ïa ki umpohliew ban mih.

34 U pynlong ïa ka khyndew basboh ban kylla ri khlaw mluh namar ka jingbymman jong kito kiba shong hangta.

35 U pynkylla ki pung-um ïa ki ri shyiap bad pynmih umpohliew ha ki jaka ba-rkhiang.

36 U shah ïa ki briew kiba thngan ban shongduh hangta, bad tei ki nongbah ban shong ban sah ha ki.

37 Ki rep lyngkha bad ki thung ki dieng sohwaiñ bad ki lum ka jingot kaba dap kyrhai.

38 U kyrkhu ïa ki briew jong u, bad ki don bun ki khun ki kti; u pynlong ba ki jingri jingdup jong ki kin ym duna.

39 Haba ki briew jong U Blei ki shahjop bad shah ibeiñ da ki jingbanbeiñ bad jingjynjar bashyrkhei,

40 u pynpaw ka jingibeiñ ïa ki nongbanbeiñ bad u pynlong ïa ki ban sakma ha ki ri shyiap bym don lynti.

41 Hynrei u pyllait ïa kiba kyrduh na ka jingjynjar jong ki bad pynlong ïa ki longïing jong ki ban roi kum ki jingri.

42 Kiba hok ki ïohi ïa kane bad ki kmen, hynrei ïa baroh kiba bymman la pynsngap jar.

43 To ai ba kito kiba stad kin pyrkhat shaphang kine kiei kiei; to kin pyrkhat shaphang ka jingieit baneh U Trai.

Khasi CL Bible

Copyright © Bible Society of India, 2016.

Used by permission. All rights reserved worldwide.

Bible Society of India
ကြှနျုပျတို့နောကျလိုကျပါ:



ကြော်ငြာတွေ