SALM 106 - Khasi CL Bible (BSI)

Ka jingbha U Trai ïa ki briew jong u

¹ Ïaroh ïa U Trai! To ai ki jingïaroh ïa U Trai, namar u long uba bha; ka jingieit jong ka long bymjukut.

² Mano ba lah ban ïathuh ïa baroh kiei kiei kiba khraw kiba u la leh? Mano ba lah ban ïaroh ïa u kumba dei biang?

³ Suk kito kiba kohnguh ïa ki hukum jong u, kiba leh borabor ïa kaei kaba dei.

⁴ To kynmaw ïa nga, A Trai, haba me ïarap ïa ki briew jong me; kynthup ïa nga ruh haba me pynim ïa ki.

⁵ Ai ba ngan ïohi ïa ka jingroi jingpar ki briew jong me bad ïadon bynta ha ka jingkmen jong ka jaitbynriew jong me, ha ka jingsarong bakmen jong kito kiba long ki jong me.

⁶ Ngi la leh pop kumba ki kpa tymmen jong ngi ki la leh; ngi la long bymman bad sniew.

⁷ Ki kpa tymmen jong ngi ha Ijipt kim shym la sngewthuh ïa ki kam baphylla jong U Blei; ki la klet ba bunsien u la pyn-i ha ki ïa ka jingieit jong u, bad ki la ïaleh pyrshah ïa U Badonbor Baroh ha ka Duriaw Basaw.

⁸ Hynrei u la pynim ïa ki, kumba u la kular, khnang ban pyn-i ïa ka bor bakhraw jong u.

⁹ U la ai hukum ïa ka Duriaw Basaw bad ka rkhiang; u ïalam ïa ki briew jong u sha shiliang halor ka khyndew ba-rkhiang.

¹⁰ U pynim ïa ki na kito kiba shun ïa ki; u pyllait ïa ki na ki nongshun jong ki.

¹¹ Hynrei ka um ka la pynngam jyllop ïa ki nongshun jong ki; ym don uwei ruh na ki uba lait.

¹² Te ki briew jong u ki la ngeit ïa ki kular jong u bad ki rwai ki jingïaroh ïa u.

¹³ Hynrei shen ki klet noh ïa kaei kaba u la leh bad ki la leh khlem ap ïa ka jingai jingmut jong u.

¹⁴ Ïa ki la pyndap da ki jingkwah bymdei ha ka ri shyiap bad tynjuh ïa U Blei;

¹⁵ kumta u la ai ïa ki ïa kaei kaba ki la pan kwah, bad u la phah ruh ïa ka jingpang bashyrkhei hapdeng jong ki.

¹⁶ Hangta ha ka ri shyiap ki la pihuiñ ïa u Moses bad u Aaron, ki shakri bakhuid jong U Trai.

¹⁷ Nangta ka khyndew ka ang bad nguid ïa u Dathan bad tep ïa u Abiram bad ka longïing jong u;

¹⁸ ka ding ka la hap halor ki nongbud jong ki bad thang duh ïa kito ki briew kiba bymman.

¹⁹ Ki la thaw ïa u khun masi ksiar ha Sinai bad mane ïa uta u bleithaw;

²⁰ ki la ïakylliang noh ïa ka burom jong U Blei bad ka dur jong u mrad uba bam phlang.

²¹ Ki la klet ïa U Blei uba la pyllait im ïa ki da ki kam badonbor jong u ha Ijipt.

²² Haduh katno ki kam baphylla u la leh hangta! Haduh katno ki kam baphylla u la leh ha ka Duriaw Basaw!

²³ Haba U Blei u la ong ban pynjot ïa ki briew jong u, u shakri ba la jied jong u, u Moses, u la ïeng pyrshah ïa U Blei bad khang ïa ka jingbitar jong u na kaba pynjot noh ïa ki.

²⁴ Nangta ki la kyntait ïa ka ri kaba itynnat, namar ba kim ngeit ïa ka jingkular U Blei.

²⁵ Ki ïashong ha ki ïingjaiñ jong ki bad ki ïakhñium bad kim sngap ïa U Trai.

²⁶ Kumta u la ai ïa ka jingmaham kaba eh ba un pynlong ïa ki ba kin ïap ha ka ri shyiap

²⁷ bad pynsakma ïa ki khun ki ksiew jong ki hapdeng ki nongmane bleithaw, ban iehnoh ïa ki ba kin ïap ha ki ri nongwei.

²⁸ Nangta ha Peor, ki briew jong U Blei ki la ïasnohlang ha ka jingmane ïa u Baal, bad bam ïa ki jingkñia ba la ainguh ha ki blei bym don jingim.

²⁹ Ki la pynkhih ïa ka jingbitar U Trai da ki jingleh jong ki, bad ka jingpang bashyrkhei ka la mih hapdeng jong ki.

³⁰ Hynrei u Phinehas u la ïeng bad pynshitom ïa kiba leh pop bad ïa ka khlam la pynsangeh.

³¹ Ïa kane la kynmaw kum ka kam babha jong u naduh kata ka por bad yn ïai kynmaw ha ki por baroh ki ban wan.

³² Ha ki umpohliew ka Meribah ki briew ki la pynbitar ïa U Trai bad u Moses u la shem jingeh namar jong ki.

³³ Ki la pynkthang ïa u haduh katta katta haduh ba u la kren khlem da ap ban pyrkhat.

³⁴ Kim shym la pynïap ïa ki nongmane bleithaw, kumba U Trai u la hukum ïa ki ban leh,

³⁵ hynrei ki la ïashongkha khleh bad ki bad bud ïa ki rukom leh blei thala jong ki.

³⁶ Ki briew jong U Blei ki la mane ïa ki bleithaw, bad kane ka la pynlong ïa ki ba kin shah pynjot.

³⁷ Ki la ai ïa la ki jong ki khun shynrang bad khun kynthei kum ki jingkñia ha ki bleithaw jong ka Kanaan.

³⁸ Ki la pynïap ïa kito ki khun balui lui, bad ïa ka ri la pynjyrsieh da kita ki jingpynïap briew.

³⁹ Ki la pynlong ïa lade ki bymkhuid da ki jingleh jong ki bad ki la long bymïaineh ha U Blei.

⁴⁰ Kumta U Trai u la bitar ïa ki briew jong u; u la sngewngiah ïa ki.

⁴¹ U la iehnoh ïa ki ha ka bor jong ki nongmane bleithaw, bad ki nongshun jong ki, ki synshar halor jong ki.

⁴² Ki la shah banbeiñ ha ki nongshun jong ki bad ki la long nadong shadong hapoh ka jingpynïaid jong ki.

⁴³ Bunsien U Trai u pyllait ïa ki briew jong u, hynrei ki jied ban ïaleh pyrshah ïa u bad ngam kham jylliew ha ka pop.

⁴⁴ Pynban U Trai u la ïohsngew ïa ki haba ki kyang, bad u khmih ïa ki jingjynjar jong ki.

⁴⁵ Na ka bynta jong ki u kynmaw ïa ka jutang jong u, bad namar ka jingieit bakhraw jong u, u la kylla jingmut.

⁴⁶ U la pynlong ïa baroh ki nongbanbeiñ jong ki ban sngewsynei ïa ki.

⁴⁷ To pynim ïa ngi, A Trai, U Blei jong ngi, bad wallam pat ïa ngi napdeng ki jaitbynriew, ba ngi lah ban sngewnguh bad ïaroh ïa ka kyrteng bakhuid jong me.

⁴⁸ Ïaroh ïa U Trai, U Blei jong ki Israel; ïaroh ïa u mynta bad junom! Ai ba baroh kin ong, “Amen!” Ïaroh ïa U Trai!