SALM 105 - Khasi CL Bible (BSI)

U Blei bad ki briew jong u

¹ To ainguh ïa U Trai, pynbna ïa ka jingkhraw jong u; ïathuh ïa ki jaitbynriew ïa kaei kaba u la leh.

² To rwai ka jingïaroh ïa U Trai; ïathuh ïa kiei kiei kiba phylla kiba u la leh.

³ To kmen ba ngi long ki jong u; ai ba baroh kiba mane ïa u kin shadkmen.

⁴ To leit sha U Trai ban ïoh jingïarap; bad to mane ïa u borabor.

^5-6 Ma phi ki khun ki ksiew jong u Abraham, u shakri jong u; ma phi ki khun ki ksiew u Jakob, u briew uba u la jied: Kynmaw ïa ki kambah ba U Blei u la leh bad ki jingbishar kiba u la ai.

⁷ U Trai u long U Blei jong ngi; ki hukum jong u ki long ïa ka pyrthei baroh.

⁸ Un bat ïa ka jutang jong u junom, ki jingkular jong u na ka bynta ki hajar ki pateng.

⁹ Un bat ïa ka jingïakut ba u la pynlong bad u Abraham bad ïa ka kular bad u Isaak.

¹⁰ U Trai u la pynlong ïa ka jutang bad u Jakob, ka jutang ka ban neh junom.

¹¹ “Ngan ai ha phi ïa ka ri Kanaan,” u ong. “Kan long ka jingïohkynti jong phi hi.”

¹² Ki briew jong U Blei ki long khyndiat ha ka jingbun briew, ki long ki nongwei ha ka ri Kanaan.

¹³ Ki ïaidwir na kawei ka ri sha kawei pat, na kawei ka hima sha kawei pat.

¹⁴ Hynrei U Blei um shym la shah ïano ïano ban lehbeiñ ïa ki; ban ïada ïa ki, u maham ïa ki syiem:

¹⁵ “Wat pynmynsaw ïa ki shakri ba la jied jong nga; wat ktah ïa ki nongïathuhlypa jong nga.”

¹⁶ U Trai u la phah 'nemsniew sha ka ri jong ki bad u la shim noh ïa baroh ka jingbam jong ki.

¹⁷ Hynrei u la phah ïa u briew ha shuwa jong ki, u Joseph, ïa uba la die kum u mraw.

¹⁸ Ïa ki kjat jong u la khum da ki kynjri, bad ïa u nar la pyndait sawdong ka ryndang jong u,

¹⁹ haduh ka por ba ïa kaei kaba u la ïathuh lypa, ka la urlong shisha. Ka ktien U Trai ka la pynshisha ba um shym bakla.

²⁰ Nangta u syiem ka Ijipt u la phah pyllait ïa u; u nongsynshar ki jaitbynriew u la pyllait ïa u.

²¹ U la buh ïa u ban pynïaid ïa ka sorkar jong u bad pynlong ïa u, u nongsynshar halor ka ri baroh kawei,

²² bad ka bor halor ki rangbah synshar jong u syiem bad ka iktiar ban ai jingbthah ïa ki nongai jingmut jong u.

²³ Nangta u Jakob u leit sha Ijipt bad u shongduh ha kata ka ri.

²⁴ U Trai u la ai shibun ki khun ïa ki briew jong u bad pynlong ïa ki kiba kham khlaiñ ban ïa ki nongshun jong ki.

²⁵ U la pynlong ïa ki nong Ijipt ban isih ïa ki briew jong u bad leh shukor ïa ki shakri jong u.

²⁶ Nangta u phah ïa u shakri jong u, u Moses, bad u Aaron, ïa kiba u la jied.

²⁷ Ki la leh ïa ki kam kiba donbor jong U Blei bad leh ïa ki kambah ha Ijipt.

²⁸ U Blei u la phah ïa ka jingdum ha ka ri, hynrei ki nong Ijipt kim shym la kohnguh ïa ka hukum jong u.

²⁹ U la pynkylla ïa ki wah jong ki sha ka snam bad pynïap ïa baroh ki dohkha jong ki.

³⁰ Ïa ka ri jong ki la pyndap da ki jakoid, wat ïa ka ïingsyiem la pyndap da ki.

³¹ U Blei u la hukum, bad ki skain bad ki mait ki la dap kylleng ïa ka ri baroh kawei.

³² U la phah ïa u phria bad ka leilieh ha ka ri jong ki ha ka jaka jong u slap;

³³ u la pynjot ïa ki dieng sohwaiñ jong ki bad ïa ki dieng Dumbur bad u la pynkheiñ ïa baroh ki dieng.

³⁴ U la hukum, bad ki puit ki ïawan da ki million bad ym lah ñiew shuh ïa ki;

³⁵ ki la ïabam ïa baroh ki jingthung ha ka ri; bad ki la ïabam ïa baroh ki jingthung ba long jingbam.

³⁶ U pynïap ïa ki khun shynrang kiba nyngkong jong baroh ki longïing jong ka Ijipt.

³⁷ Nangta u pynmih bad ïalam noh ïa ki Israel; ki rah ïa ka rupa bad ka ksiar, bad baroh ki la long kiba koit kiba khiah bad kiba khlaiñ.

³⁸ Ki nong Ijipt ki la sheptieng ïa ki bad ki la kmen haba ki la mih.

³⁹ U Blei u buh ïa u lyoh halor ki briew jong u bad ïa ka ding mynmiet ban ai jingshai ïa ki.

⁴⁰ Ki pan, bad u phah ïa ki syiar khlaw; u ai ïa ki ka jingbam na bneng ban pynhun ïa ki.

⁴¹ U plie ïa u mawsiang, bad ka um ka mih shabar, ka tuid lyngba ka ri shyiap kum ka wah.

⁴² U la kynmaw ïa ka jingkular bakyntang jong u ïa u Abraham u shakri jong u.

⁴³ Kumta u ïalam noh ïa ki briew ba la jied jong u, bad ki rwai bad pyrta da ka jingkmen.

⁴⁴ U la ai ha ki ïa ki ri jong kiwei pat ki jaitbynriew bad u la shah ïa ki ban shim noh ïa ki pyntha jong ki,

⁴⁵ khnang ba ki briew jong u kin kohnguh ïa ki aiñ jong u bad ban bat ïa ki hukum jong u baroh. Ïaroh ïa U Trai!