SALM 103 - Khasi CL Bible (BSI)

Ka jingieit U Blei

¹ Ïaroh ïa U Trai, ko mynsiem jong nga! Baroh kaba ha nga, to ïaroh ïa ka kyrteng bakhuid jong u!

² Ïaroh ïa U Trai, ko mynsiem jong nga, bad wat klet haduh katno u long uba sbun.

³ U map ïa ki pop jong nga baroh bad u pynkhiah ïa ki jingpang jong nga baroh.

⁴ U pyllait ïa nga na ka jingtep bad u kyrkhu ïa nga da ka jingieit bad ka jingisynei.

⁵ U pyndap ïa ka jingim jong nga da kiei kiei kiba bha, ba kumta la pynthymmai bor ïa ka jinglong samla jong nga kum u pukni.

⁶ U Trai u bishar sngewlem ïa kiba shah banbeiñ bad u ai ha ki ïa ki hok jong ki.

⁷ U pynpaw ïa ki jingthmu jong u ha u Moses bad u shah ïa ki paid Israel ban ïohi ïa ki kam badonbor jong u.

⁸ U Trai u long uba isynei bad uba dap da ka jingieit, uba suki ban bitar bad uba dap da ka jingieit baneh.

⁹ Um ju ïai mai lynter; um bitar junom.

¹⁰ Um pynshitom ïa ngi kumba ngi dei hok ban shah lane ban siew kylliang ïa ngi kat kum ki pop bad ki jingbakla jong ngi.

¹¹ Kumba ka suiñbneng ka jrong na ka khyndew, kumta ka khraw ka jingieit jong u ïa kito kiba pyndonburom ïa u.

¹² Kumba ka jngai ka mihngi na ka sepngi, kumta ruh u weng noh ïa ki pop jong ngi na ngi.

¹³ Kumba u kpa u long uba sbun ïa ki khun jong u, kumjuh ruh U Trai u long uba sbun ïa kito kiba pyndonburom ïa u.

¹⁴ U tip na kaei la thaw ïa ngi; u kynmaw ba ngi long ka khyndew.

¹⁵ Kumba ka long, ka jingim jong ngi ka long kum u phlang, ngi san bad ngi roi kum u syntiew khlaw;

¹⁶ nangta ka lyer ka beh halor jong u, bad u jah noh — ym don ba ïohi shuh ïa u.

¹⁷ Hynrei ïa kito kiba pyndonburom ïa U Trai, ka jingieit jong u ka neh junom, bad ka jingbha jong u ka ïaisah pateng la pateng

¹⁸ ha kito kiba batskhem ïa ka jutang jong u bad kiba ïaineh ha ka jingkohnguh ïa ki hukum jong u.

¹⁹ U Trai u la buh ïa ka khet jong u ha bneng; u long u syiem halor baroh.

²⁰ Ïaroh ïa U Trai, ma phi ki angel bakhlaiñ bad badonbor, kiba kohnguh ïa ki hukum jong u, kiba shahshkor ïa kaei kaba u ong.

²¹ Ïaroh ïa U Trai, phi baroh ki bor ba kynja bneng, phi ki shakri jong u, kiba leh ïa ka mon jong u!

²² Ïaroh ïa U Trai, phi baroh ki jingthaw jong u ha ki jaka baroh ba u synshar. Ïaroh ïa U Trai, ko mynsiem jong nga!