SALM 102 - Khasi CL Bible (BSI)

Ka jingduwai jong u samla ba shem jynjar

¹ To shahshkor ïa ka jingduwai jong nga, A Trai, bad to sngew ïa ka jingkyang jong nga ban ïoh jingïarap!

² Haba nga don hapdeng ka jingjynjar, to wat phai noh na nga! To sngew ïa nga, bad to jubab kloi haba nga khot kyrpad!

³ Ka jingim jong nga ka la nang jah kum ka tdem; ka met jong nga ka ing kum ka ding.

⁴ Ïa nga la shoh kum ïa u phlangïap ba-rkhiang; nga la duh noh ïa ka jingkwah ban bam jingbam.

⁵ Nga ud jam; ngam don ei ei shuh sa tang ki shyieng bad ka snep.

⁶ Nga long kum ka sim khlaw ha ka ri shyiap, kum ka dkhoh ha ki jaka ba la long kynjah.

⁷ Nga thiah khlem samthiah; nga long kum ka sim marwei halor tnum ïing.

⁸ Baroh shi sngi ki nongshun jong nga ki ñiewbeiñ ïa nga; kito kiba krenbeiñ ïa nga ki pyndonkam ïa ka kyrteng jong nga kum ka jingtim.

^9-10 Namar ka jingbitar bad ka jingbitar shla jong me, u dpei u la long ka jingbam jong nga, bad ki ummat jong nga ki ïakhleh bad ka jingdih jong nga. Me la sei ïa nga bad bret noh ïa nga.

¹¹ Ka jingim jong nga ka la long kum ki syrngiew janmiet; nga la long kum u phlang ba-rkhiang.

¹² Hynrei ma me, A Trai, me long u syiem junom; baroh ki pateng kin kynmaw ïa me.

¹³ Men ïeng bad leh-isynei ïa ka Seïon; ka por ka la poi ban leh-isynei ïa ka; kane ka dei ka por kaba biang bha.

¹⁴ Ki shakri jong me ki ieit ïa ka, wat haba la pynjot ïa ka; ki leh-isynei ïa ka, wat haba ka don ha ka jingjot.

¹⁵ Ki jaitbynriew kin sheptieng ïa U Trai; baroh ki syiem jong ka pyrthei kin sheptieng ïa ka bor jong u.

¹⁶ Haba U Trai un tei pat ïa ka Seïon, un sa pynpaw ïa ka jingkhraw jong u.

¹⁷ Un sngew ïa ki briew jong u ïa kiba la iehnoh bad un shahshkor ïa ka jingduwai jong ki.

¹⁸ To thoh na ka bynta ka pateng ka ban sa wan ïa kaei kaba U Trai u la leh, khnang ba ki briew ïa ki bym pat shym la kha kin ïaroh ïa u.

¹⁹ U Trai u khmih sha tbian na ka jaka bakhuid jong u na neng, u khmih na bneng sha ka pyrthei.

²⁰ U ïohsngew ïa ki jingud jong ki koidi bad u pyllait ïa kito kiba la shah pynrem ban ïap.

²¹ Bad kumta ïa ka kyrteng jong u yn pynbna ha Seïon, bad yn ïaroh ïa u ha Jerusalem

²² haba ki jaitbynriew bad ki hima kin ïalumlang bad mane ïa U Trai.

²³ U Trai u la pynlong tlot ïa nga haba nga dang samla; u la pynlyngkot ïa ka jingim jong nga.

²⁴ A Blei, wat shim noh ïa nga mynta shuwa ba ngan long tymmen. A Trai, me im junom;

²⁵ naduh slem bah me la thaw ïa ka pyrthei, bad da ki kti jong me hi me la thaw ïa ki bneng.

²⁶ Kin sa jah noh, hynrei me te men sah; ma ki baroh kin kylla rim kum ki jaiñphong, Men kyntait noh ïa ki kum ki jaiñphong bad kin jah noh.

²⁷ Hynrei ma me men long borabor kumjuh, bad ka jingim jong me kan ym kut lano lano ruh.

²⁸ Ki khun jong ngi kin im hapdeng ka jingshngain, bad hapoh ka jingïada jong me ki khun ki ksiew jong ki kin skhem.