SALM 10 - Khasi CL Bible (BSI)

Ka jingduwai ban ïoh ka jingbishar hok

¹ Balei me don jngai palat, A Trai? Balei me buhrieh ïa lade haba ngi don ha ka jynjar?

² Ki bymman ki sarong bad pynshitom beiñ ïa kiba duk; pynngat ïa ki ha ki jingriam kiba ki la thaw.

³ U riewbymman u sngewsarong ha la ki jong ki jingkwah basniew; u riewlalot u tim bad kyntait ïa U Trai.

⁴ U riewbymman um salia shaphang U Trai; ha ka jingsarong jong u, u pyrkhat ba U Blei um da donkam.

⁵ U riewbymman u jop ha kiei kiei baroh. Um lah ban sngewthuh ïa ki jingbishar U Blei; u rkhiebeiñ ïa ki nongshun jong u.

⁶ U ong ha lade, “Ngan ym bakla da lei lei; da lei lei ngan ym poi ha ka jingjynjar.”

⁷ Ka jingkren jong u, ka dap da ki jingtim, ki jinglamler, bad ki jingbyrngem; u kloi ban kren ki kyntien kiba dap da ka jingisih bad ka jingsniew.

⁸ U buhrieh ïa lade ha ki shnongrit, da kaba apthap ban pynïap ïa ki briew kiba lui lui. U syntiat ïa ki lanot jong u, ki bym don nongïarap,

⁹ u ap ha la ka jakarieh kum u sing. U dem ban ap ïa kiba duk, u kem ïa ki ha ki jingriam jong u bad u paring ïa ki sharud.

¹⁰ Ki lanot ki bym ïoh jingïarap ki dem ha ka jinglwet; ka jingkhlaiñ ba thombor ka la jop ïa ki.

¹¹ U riewbymman u ong ha lade, “U Blei um sngew ei ei! u la khapbrip ïa la ki khmat bad un ym ïohi ïa nga da lei lei!”

¹² A Trai, to pynshitom ïa kito ki riewbymman! To kynmaw ïa kito kiba shahshitom!

¹³ Kumno u riewbymman u ibeiñ ïa U Blei bad ong ha lade, “Un ym pynshitom ïa nga?”

¹⁴ Hynrei me, me ïohi; me khmih ïa ka jingjynjar bad ka jingshah shitom, bad me ïailong uba la kloi ban ïarap. U briew u bym don nongïarap u aiti ïa lade ha me; me la ju ïarap ïa uba kyrduh.

¹⁵ Pynkheiñ ïa ka bor jong ki riewbymman bad ki riewsniew; pynshitom ïa ki namar ka jingbakla kaba ki la leh tad haduh ba kin ym leh shuh ïa ka.

¹⁶ U Trai u long u syiem junom la junom. Kito kiba mane ïa kiwei pat ki blei kin jah noh na ka ri jong u.

¹⁷ A Trai, men shahshkor ïa ki jingduwai jong kiba rit kyrdan; me ai ha ki ka jingshlur.

¹⁸ Men ïohsngew ïa ka jingkyang jong kiba shah banbeiñ bad jong ki khunswet; men bishar da kaba sngewlem ïa ki; ba kumta ki briew kin ym pynjia jingshyrkhei shuh.