RUTH 4 - Khasi CL Bible (BSI)

U Boas u shongkurim ïa ka Ruth

¹ U Boas u leit sha ka jaka ïakynduh lang ha ka khyrdop shnong bad u shong hangta. Nangta u kur uba ïajan eh jong u Elimelekh, u briew uba u Boas u la ïathuh, u la wan ïaid nangta, bad u Boas u khot ïa u, “Ko paralok, wan ban shong hangne.” Kumta u la leit ban shong hangta.

² Nangta u Boas u khot shiphew ngut ki nongïalam jong ka shnong bad u ong ïa ki ba kin ïashong lem hangta.

³ Haba ki la ïashong, u ong ha uba ha ïing jong u, “Mynta ba ka Naomi ka la wan phai na Moab, ka kwah ban die noh ïa ka lyngkha kaba dei ka jong u Elimelekh, u kur jong ngi,

⁴ bad nga pyrkhat ba phi dei ban tip shaphang kane. Te mynta, lada phi kwah ïa ka, to thied ïa ka ha kaba ïadon lang kine ki rangbah kiba ïashong hangne. Hynrei lada phim kwah ïa ka, to ong kumta, namar ka hok ban thied ïa ka, ka dei nyngkong eh ka jong phi bad nangta pat kan dei ka jong nga.” Uta u briew u ong, “Ngan thied ïa ka.”

⁵ U Boas u ong, “O kumta, hynrei lada phi thied ïa ka lyngkha na ka Naomi, te phi dei ruh ban thied ïa ka Ruth, ka nong Moab ba la sah riewkynthei, khnang ba ka lyngkha kan sah ha ka longïing jong uta uba la ïap.”

⁶ Uta u briew u jubab, “Lada ka long kumta, ngan iehnoh ïa ka hok jong nga ban thied ïa ka lyngkha, namar kan mut ba ki khun ki kti jong nga kin ym ïohkynti ïa ka. Thied noh ma phi; nga te ngam treh.”

⁷ Te ha kito ki sngi, ban pynskhem ïa ka jingïadie lane ka jingïapeiñ ïa ka jaka ka puta, ka long ka rukom jong u nongdie ban loit ïa la ki juti bad ban ai ha u nongthied. Ha kane ka rukom ki Israel ki pyn-i ba la pynskhem ïa ka kam.

⁸ Kumta haba uta u briew u ong ha u Boas, “Thied noh ma phi,” u loit ïa la ka juti bad u ai ïa ka ha u Boas.

⁹ Nangta u Boas u ong ha ki nongïalam bad ha baroh kiba don hangta, “Phi baroh ha kane ka sngi phi sakhi ba nga la thied na ka Naomi ïa kiei kiei baroh kiba dei ki jong u Elimelekh bad jong ki khun shynrang jong u, u Khilion bad u Mahlon.

¹⁰ Nalor kata, ka Ruth ka nong Moab, ka thei ïap lok jong u Mahlon, kan long ka tnga jong nga. Kane kan pynsah ïa ka nongtymmen ha ka longïing jong uba la ïap, bad kumta ka jait jong u kan ïai bteng hapdeng la ki jong ki briew bad ha la ka shnong. Ha kane ka sngi phi long ki sakhi ïa kane.”

¹¹ Ki nongïalam bad kita kiwei ki ong, “Ho-oid, ngi long ki sakhi. To U Trai un pynlong ïa ka tnga jong phi kum ka Rakhel bad ka Leah, kiba la kha bun ngut ki khun ïa u Jakob. To phin long uba riewspah ha ka kur Ephrath bad uba pawnam ha Bethlehem.

¹² To ki khun ki kti kiba U Trai un ai ïa phi da kane ka theisamla kin pynlong ïa ka longïing jong phi kum ka longïing u Peres, u khun jong u Judah bad ka Tamar.”

U Boas bad ki khun ki ksiew jong u

¹³ Kumta u Boas u shim ïa ka Ruth sha la ïing kum ka tnga jong u. U Trai u la kyrkhu ïa ka, bad ka la punkhun, bad ka la kha khun shynrang.

¹⁴ Ki kynthei ki ong ha ka Naomi, “Ïaroh ïa U Trai! U la ai ha phi mynta ka sngi u khun ksiew u ban sumar sukher ïa phi. To une u khynnah un long uba pawnam ha Israel!

¹⁵ Ka pyrsa kurim jong phi ka ieit ïa phi, bad ka la leh kham bun na ka bynta jong phi ban ïa ki hynñiew ngut ki khun shynrang. Bad mynta ka la ai ha phi u khun ksiew, u ban wallam ka jingim thymmai ha phi bad ai ha phi ka jingshngain ha ka rta tymmen jong phi.”

¹⁶ Ka Naomi ka la shim ïa u khunlung, ka kdup ïa u, bad ka ri sumar ïa u.

¹⁷ Ki kynthei kiba sah marjan ki pynkyrteng ïa uta u khynnah, u Obed. Ki ïathuh ïa uwei pa uwei, “La kha khun shynrang ïa ka Naomi!” U Obed u kylla long u kpa jong u Jesse, uba long u kpa jong u Dabid.

^18-22 Kane ka dei ka jinghiarpateng ka longïing na u Peres haduh u Dabid; U Peres, u Hesron, u Ram, u Amminadab, u Nahshon, u Salmon, u Boas, u Obed, u Jesse, u Dabid.