RUTH 3 - Khasi CL Bible (BSI)

Ka Ruth ka shem ïa u tnga

¹ Hadien katto katne por ka Naomi ka ong ha ka Ruth, “Nga dei ban shem u tnga na ka bynta jong phi, khnang ba phin don la ka jong ka longïing.

² Kynmaw ba une u briew, u Boas, uba phi la ïatrei lem bad ki kynthei jong u, u dei u ba-ha-ïing jong ngi. Shahshkor mynta. Ha kane ka janmiet un leit dung ïa u barli.

³ Te sum sleh ïa lade, sleh ki jingiwbih, bad phong ki jaiñ kiba bha tam. Nangta leit sha ka jaka ba u dung kew; hynrei wat ai ba un tip ba phi don hangta tad haduh ba un da dep bam dep dih.

⁴ Da pynthikna bha ha-ei u thiah, bad hadien ba u la ïohthiah, leit bad khyllied ïa ki jaiñ tap bad thiah ha ki kjat jong u. Un sa ïathuh ïa phi kaei ba phi dei ban leh.”

⁵ Ka Ruth ka jubab, “Ngan leh ïa kaei kaei baroh kaba phi ong.”

⁶ Kumta ka Ruth ka leit sha ka jaka dung kew bad ka la leh ïa kaei kaba ka kiaw kurim jong ka, ka la bthah ïa ka.

⁷ Haba u Boas u la dep bam dep dih, u la don ha ka jingsngewtynnat bha. U leit sha ka kynton barli bad u thiah hangta. Ka Ruth ka leit jar jar, ka khyllied ïa ki jaiñ tap bad ka thiah ha ki kjat jong u.

⁸ Ha ka por mynmiet u kyndit thiah kynsan, u phai, bad u lyngngoh ban shem ïa ka kynthei kaba thiah ha ki kjat jong u.

⁹ “Pha dei kaei?” u kylli. “Kynrad, nga dei ka Ruth,” ka jubab. “Namar ba phi dei u ba-ha-ïing uba ïajan eh, phi don jingkitkhlieh ban ri sumar ïa nga. Kumta sngewbha ban shongkurim ïa nga.”

¹⁰ “U Trai un kyrkhu ïa phi,” u ong. “Phi pyn-i ka kamram kaba khraw kaba ïadei bad ka longïing ha kaei kaba phi leh mynta ban ïa kaei kaba phi la leh ïa la ka kiaw kurim. Phin jin da la leit wad ïa u rangsamla, la u dei uba riewspah ne uba duk, hynrei phim shym leh kumta.

¹¹ Ruth, mynta wat khuslai. Ngan leh ïa kaei kaei baroh kaba phi pan; kumba baroh ha shnong ki ïatip, phi dei ka kynthei kaba donburom.

¹² Ka long kaba shisha ba nga dei u ba-ha-ïing uba kham ïajan bad ba nga don jingkitkhlieh na ka bynta jong phi, hynrei don u briew uba dei u ba-ha-ïing uba kham ïajan ban ïa nga.

¹³ Sah hangne baroh shi miet, bad ha ka por mynstep ngin sa wad la un shim jingkitkhlieh ne em na ka bynta jong phi. Lada ka long kumta, ka la bha; lada kam long kumta, te nga smai ha U Trai Uba im ba ngan shim ïa ka jingkitkhlieh. Mynta to thiah bad sah hangne haduh mynstep.”

¹⁴ Kumta ka thiah hangta ha ki kjat jong u, hynrei ka la khie ha shuwa ban kynjat shai ïoh don ba ïohi ïa ka, namar ba u Boas um kwah ïano ïano ban tip ba ka la don hangta.

¹⁵ U Boas u ong ïa ka, “Law ïa kato ka jaiñkup bad siang ïa ka hangne.” Ka leh kumta, bad u theh hangta jan dap arphew kilo u barli bad u ïarap ïa ka ban kyntiew halor ka tyrpeng jong ka. Nangta ka leit phai bad kata sha shnong.

¹⁶ Haba ka la poi ha ïing, ka kiaw jong ka, ka kylli ïa ka, “Ka long kumno, ko khun kynthei jong nga?” Ka Ruth ka ïathuh ha ka ïa kaei kaei baroh kaba u Boas u la leh na ka bynta jong ka.

¹⁷ Ka bynrap, “U ong ïa nga ba ngam dei ban wan phai thylli sha phi, kumta u ai ïa nga ïa une u barli baroh.”

¹⁸ Ka Naomi ka ong ha ka, “Ruth, ïaishah mynta, tad haduh ba phin da ïohi kumno kane baroh kan sa long. U Boas un ym shongthait mynta ka sngi tad haduh ba un da pyndep ïa kane ka kam.”