RUTH 2 - Khasi CL Bible (BSI)

Ka Ruth ka trei ha ka lyngkha jong u Boas

¹ Ka Naomi ka don u ba-ha-ïing uba kyrteng u Boas, u briew uba riewspah bad ïa uba la ñiewkor shibun uba na ka longïing jong u tnga jong ka, u Elimelekh.

² Ha kawei ka sngi ka Ruth ka ong ha ka Naomi, “Shah ba ngan leit sha ki lyngkha ban tam ïa u kew ba ki nongot ki ieh. Nga thikna ban shem u briew u ban shah ïa nga ban trei bad u.” Ka Naomi ka ong, “Khie leit, ko khun jong nga.”

³ Kumta ka Ruth ka leit sha ki lyngkha bad ka ïaid nadien jong ki nongot, ka da tam ïa u kew uba ki ieh. Ka leit jia ryngkhat ba ka don ha ka lyngkha kaba dei ka jong u Boas.

⁴ Hadien katto katne por u Boas da lade hi u wan poi na Bethlehem bad u ai khublei ïa ki nongtrei. “To U Trai un long ryngkat bad phi!” u ong. “U Trai u kyrkhu ïa phi!” ki jubab.

⁵ U Boas u kylli ïa u briew uba pynïaidkam, “Katai ka theisamla ka dei mano?”

⁶ Uta u briew u jubab, “Ka dei ka theisamla nongwei kaba la wan phai na Moab bad ka Naomi.

⁷ Ka kyrpad ïa nga ban shah ba kan bud nadien jong ki nongot bad tam ïa u kew. Ka la trei naduh dang step phyrngab bad dang myntan ka shongthait shipor hapoh ka jingkahtngen.”

⁸ Nangta u Boas u ong ha ka Ruth, “Shah ngan ai jingmut katto katne ïa phi. Wat leit tam kew shawei pat lait tang ha kane ka lyngkha. Trei para kynthei hangne;

⁹ khmih ïa ki ban ïohi hangno ki ot bad don lang bad ki. Nga la hukum ïa ki rangbah jong nga ba kin ym leh bymdei ïa phi. Bad man ba phi sliang, leit ban dih na ki khra um ba ki la pyndap.”

¹⁰ Ka Ruth ka nguh ngon haduh khyndew, bad ka ong ha u Boas, “Balei phi da pyrkhat ïa nga haduh katta katta? Balei phi da lehsbun haduh katta katta ïa ka nongwei?”

¹¹ U Boas u jubab, “Nga la ïohsngew shaphang kiei kiei baroh kaba phi la leh ïa la ka kiaw kurim naduh ba u tnga jong phi u la ïap. Nga tip kumno phi la iehnoh ïa la ki kmie ki kpa bad ïa la ka ri ruh, bad kumno phi la wan ban shong ban sah hapdeng ki briew kiba phim pat ju ithuh mynno mynno.

¹² To U Trai un ainong ïa phi namar kaei kaba phi la leh. Ai ba phin ïoh ka bainong kaba pura na U Trai U Blei ki Israel, sha uba phi la wan ban ïoh jingïada.”

¹³ Ka Ruth ka jubab, “Kynrad, phi la lehsbun shibun ïa nga. Phi la pynlong ïa nga ban kham sngewbiang da kaba kren jem jai jai ïa nga, wat la ngam ïaryngkat kyrdan bad kawei na ki shakri jong phi.”

¹⁴ Ha ka por bam, u Boas u ong ïa ka Ruth, “Wan bad shim shi lyngkhot u kpu, bad wieh ïa u ha kane ka sos.” Kumta ka la shong lang bad ki nongtrei, bad u Boas u ai ïa ka katto katne u kew sdieh. Ka la bam haduh ban da sngewhun, bad ka dang don katto katne ka jingbam kaba sah tam.

^15-16 Hadien ba ka la mihnoh ban leit tam kew, u Boas u hukum ïa ki nongtrei, “Shah ïa ka ban tam wat na ka jaka ha kaba ki song ki don, bad wat ong ei ei ban khang ïa ka. Nalor kata, sei ruh katto katne ki kew na ki song bad ieh ïa ki ba kan ïoh tam.”

¹⁷ Kumta ka Ruth ka ïai tam kew ha ka lyngkha haduh janmiet, bad haba ka la shoh ïa u, ka shem ba ka la ïohlum la jan shiphew kilo.

¹⁸ Ka leit rah ïa u kew sha shnong bad ka pyn-i ha la ka kiaw kurim haduh katno ka la lum. Ka la ai ruh ha ka ïa kata ka jingbam kaba sah tam.

¹⁹ Ka Naomi ka kylli ïa ka, “Hangno phi ïohlum ïa kine baroh? Ha ka lyngkha jongno phi ïoh trei? To U Blei un kyrkhu ïa u briew uba shem jingsngewbha ha phi!” Kumta ka Ruth ka ïathuh ha ka Naomi ba ka la trei ha ka lyngkha kaba dei jong u briew uba kyrteng u Boas.

²⁰ “To U Blei un kyrkhu ïa u Boas!” ka Naomi ka pyrta. “U Trai borabor u bat ïa la ki kular ha kiba im bad kiba ïap!” Bad ka ong shuh shuh, “Uta u briew u dei u ba-ha-ïing uba jan eh jong ngi, uwei na kito kiba kitkhlieh ban ri sumar ïa ngi.”

²¹ Nangta ka Ruth ka ong, “Kaba kor tam na baroh, u ong ba ngan ïai tam kew bad ki nongtrei jong u haduh ba kin da pyndep ïa ka jingot.”

²² Ka Naomi ka ong ha ka Ruth, “Ho-oid, ko khun kynthei jong nga; kan kham bha shibun ïa phi ban trei bad ki kynthei ha ka lyngkha jong u Boas. Phi lah ban shah leh bymdei lada phi leit sha ka lyngkha jong kiwei.”

²³ Kumta ka Ruth ka la trei bad ki bad ka la tam kew haduh ban da dep ot lut ïa u barli bad ïa u kew baroh. Bad ka la ïaishong sah bad la ka kiaw kurim.