RUTH 1 - Khasi CL Bible (BSI)

U Elimelekh bad ka longïing jong u ki kynriah sha Moab

^1-2 Slem bah mynshuwa, ha ki sngi shuwa ba ki Israel kin ïoh syiem, la don ka 'nemsniew ha ka ri. Kumta u briew uba kyrteng u Elimelekh, uba na ka kur Ephrath bad uba shong ha Bethlehem kaba ha Judah, u leit bad ka Naomi ka tnga jong u lem bad ki ar ngut ki khun shynrang jong ki, u Mahlon bad u Khilion, ban sah shipor ha ka ri Moab. Katba ki dang sah hangta,

³ u Elimelekh u la ïap, bad ka Naomi ka la shah iehnoh marwei bad ki ar ngut ki khun shynrang jong ka,

⁴ kiba la shongkurim ïa ki kynthei Moab, ka Orpah bad ka Ruth. Kumba shiphew snem hadien,

⁵ u Mahlon bad u Khilion ruh ki la ïap, bad ka Naomi ka la shah iehnoh sa tang marwei, khlem u tnga ne ki khun shynrang.

Ka Naomi bad ka Ruth ki leit phai sha Bethlehem

⁶ Hadien katto katne por ka Naomi ka ïohsngew ba U Trai u la kyrkhu ïa la ki briew da kaba ai ha ki ka jingot kaba bha; kumta ka la khreh ban mihnoh na Moab lem bad la ki pyrsa kurim.

⁷ Ki ïamih ban leit phai lang sha Judah, hynrei ha lynti ka ong ïa ki,

⁸ “Khie leit phai noh sha ïing bad sah bad la ki kmie. Ai ba U Trai un lehbha ïa phi kumba phi la leh ïa nga bad ïa kito kiba la ïap.

⁹ Bad to ai ba U Trai un pynlah ïa phi baroh ar ngut ban shongkurim biang bad ban don la ka longïing.” Kumta ka Naomi ka doh khublei ïa ki. Hynrei ki la sdang ban ïam bad ki ong ha ka,

¹⁰ “Em! Ngin leit bad phi sha ki briew jong phi.”

¹¹ “Ko ki khun kynthei jong nga, phi dei ban leit phai noh,” ka Naomi ka jubab. “Balei phi kwah ban wan bad nga? Hato phi mut ngan dang ïoh khun shynrang biang na ka bynta jong phi ban shongkurim?

¹² Khie leit phai noh sha ïing, naba nga la tymmen ban shongkurim biang. Wat lada nga pyrkhat ba dang don jingkyrmen, bad kumta ban shongkurim ha kane ka miet bad ïoh khun shynrang,

¹³ hato phi lah hi ban ap haduh ba kin da san? Hato kane kan khanglad ïa phi na kaba shongkurim ïano ïano? Em, ko khun kynthei jong nga, phi tip ba kata kam lah ban long. U Trai u la phai pyrshah ïa nga, bad nga sngewsih shikatdei eh ïa phi.”

¹⁴ Sa shisien pat ki sdang ban ïam. Nangta ka Orpah ka doh khublei ïa la ka kiaw kurim bad ka leit phai pat sha ïing, hynrei ka Ruth ka snoh rdin ha ka.

¹⁵ Kumta ka Naomi ka ong ha ka, “Ruth, ka para kynsi jong pha ka la leit phai sha la ki briew bad sha la u blei. Khie leit phai sha ïing bad ka.”

¹⁶ Hynrei ka Ruth ka jubab, “Wat ong ïa nga ban iehnoh ïa phi! Shah ba ngan leit bad phi. Kat shaba phi leit, ngan leit; kat haba phi shong phi sah, hangta ngan shong ngan sah. Ki briew jong phi kin long ki briew jong nga, bad U Blei jong phi un long U Blei jong nga.

¹⁷ Hangno hangno ba phi ïap, hangta ngan ïap, bad dei hangta ba yn tep ïa nga. Ai ba ka jingpynshitom bashyrkhei eh jong U Trai kan wan hap halor jong nga lada nga shah ïa kaei kaei lait noh ka jingïap hi ka ban pynïakhlad ïa nga na phi!”

¹⁸ Haba ka Naomi ka ïohi ba ka Ruth ka la kut jingmut skhem ban leit bad ka, kam shym ong ei ei shuh.

¹⁹ Ki ïaid shaphrang haduh ba kin da poi ha Bethlehem. Haba ki la poi hangta, ka shnong baroh kawei ka la sngewkmen, bad ki kynthei kiba hangta ki la pyrta, “Hato kane ka dei shisha ka Naomi?”

²⁰ “Wat khot ïa nga, ka Naomi,” ka jubab; “khot noh ïa nga, ka Marah, namar U Blei Bakhrawbor u la pynlong ïa ka jingim jong nga kaba kthang.

²¹ Mynba nga mihnoh nangne, nga don kyrhai, hynrei U Trai u la wallam thylli ïa nga. Balei yn khot ïa nga ka Naomi haba U Trai Uba Khrawbor u la pynrem bad phah jingjynjar ha nga?”

²² Kumne keiñ, kumno ba ka Naomi ka wan phai pat na Moab lem bad ka Ruth, ka pyrsa kurim nong Moab. Ka dei hamar ba sdang ka por ot barli ba ki wan poi ha Bethlehem.