Ka Shithi U Paul Sha Ki Nong Rom 9 - Khasi CL Bible (BSI)

U Blei bad ki briew jong u

¹ Nga kren ïa ka jingshisha, nga long u jong U Khrist bad ngam kren ïa ka bymshisha. Ka jingïatiplem, ba la synshar da U Mynsiem Bakhuid ruh ka kren skhem ba ngam kren ïa ka bymshisha

² haba nga ong katno ka jingsngewsih jong nga, katno ka jingpang ba khlem kut jong ka dohnud jong nga na ka bynta ki briew jong nga, kiba long ka doh ka snam jong nga!

³ Na ka bynta jong ki nga kwah ba ngan jin da la don hapoh ka jingtim U Blei ba la pynïakhlad na U Khrist.

⁴ Ki long ki briew jong U Blei; u la pynlong ki khun jong u ïa ki bad u la pynpaw ïa ka burom jong u ha ki; u la pynlong ki jutang bad ki bad u la ai ïa ki ka Hukum; ki don ka jingmane bashisha; ki la ïoh ïa ki jingkular U Blei;

⁵ ki hiarpateng na ki kpa tymmen Hebru bapawnam; bad U Khrist, kum u briew, u long na ka jaitbynriew jong ki. To ai ba yn ïaroh junom ïa U Blei uba synshar halor baroh! Amen.

⁶ Ngam ong ba ka kular jong U Blei kam shym la treikam; namar ym baroh ki paid Israel ki long ki briew jong U Blei.

⁷ Lymne kiba hiarpateng baroh na u Abraham ki long ki khun jong U Blei. U Blei u la ong ha u Abraham, “Ka long lyngba u Isaak ba men ïoh ïa kiba hiarpateng kiba nga la kular ïa me.”

⁸ Kane ka mut ba ki khun ba la kha kat kum ka rukom, kim dei ki khun jong U Blei; hynrei, ïa ki khun ba la kha kat kum ka jingkular U Blei, la ñiew kum ki nonghiarpateng bashisha.

⁹ Naba ïa ka jingkular U Blei la pynlong ha kine ki ktien: “Ha ka por kaba dei ngan wan pat, bad ka Sarah kan ïoh khun shynrang.”

¹⁰ Bad kam dei tang katne. Naba ki ar ngut ki khun shynrang ka Rebekka ki la don ujuh u kpa, u Isaak, u kpa tymmen jong ngi.

^11-12 Hynrei khnang ba ka jingjied ïa uwei u khun shynrang kan long nadong shadong ka jingmih jong ka jingthmu U Blei hi, U Blei u la ong ïa ka, “U hynmen un shakri ïa u para.” U la ong ïa kane shuwa ba yn kha ïa ki, shuwa ba ki la leh ïa kano kano kaba bha ne kaba sniew; kumta ïa ka jingjied U Blei la pynshong nongrim ha ka jingkhot jong u, bad ym ha kano kano kaba ki la lah leh.

¹³ Kumba ka Jingthoh Bakhuid ka ong, “Nga la ieit ïa u Jakob, hynrei nga la isih ïa u Iso.”

¹⁴ Hato ngin ong te, ba U Blei u long bymhok? Ym kumta.

¹⁵ Naba u la ong ha u Moses, “Ngan leh-isynei ha uno uno uba nga kwah; ngan sngewsynei ïa uno uno uba nga kwah.”

¹⁶ Kumta te, kiei kiei baroh ki shong, ym ha kaei kaba u briew u kwah ne u leh, hynrei tang ha ka jingisynei U Blei.

¹⁷ Naba ka Jingthoh Bakhuid ka ong ïa u syiem ka Ijipt, “Nga la pynlong syiem ïa me khnang ban pyndonkam ïa me ban pyn-i ïa ka bor jong nga bad ban pynphriang ïa ka nam jong nga ha ka pyrthei baroh kawei.”

¹⁸ Kumta te, U Blei u isynei ïa uno uno uba u kwah, bad u pyneh dohnud ïa uno uno uba u kwah.

Ka jingbitar bad ka jingisynei U Blei

¹⁹ Hynrei uwei na phi un ong ha nga, “Lada kane ka long kumta, kumno U Blei un shem jingbakla badno badno? Uei uba lah ban ïeng pyrshah ïa ka mon U Blei?”

²⁰ Hynrei phi, phi long uei, ko paralok jong nga, ban jubab kylla ïa U Blei? U khiew khyndew um lah ban kylli ïa u briew uba la thaw ïa u, “Balei ba me thaw ïa nga kumne?”

²¹ Ha ka jingshisha, u briew uba thaw ïa ki khiew u don ka hok ban pyndonkam ïa ka dewbyrtha katba u kwah, bad ban thaw ar tylli ki khiew na kawei ka lyngngun dewbyrtha, ïa uwei na ka bynta ki por bakyrpang bad ïa uwei pat na ka bynta ka jingpyndonkam paidbah.

²² Bad kane ka long kumjuh ïa kaei kaba U Blei u la leh. U la kwah ban pynpaw ïa ka jingbitar jong u bad ban pynpaw ïa ka bor jong u. Hynrei u la long uba ïaishah haduh katta katta ïa kito kiba long ka daw jong ka jingbitar jong u, kiba la don ha ka lynti sha ka jingshah pynjot.

²³ Bad u la kwah ruh ban pynpaw ïa ka burom bakhraw jong u, ïa kaba la theh halor jong ngi kiba long ka jingisynei jong u, kito na ngi ïa kiba u la pynkhreh ban ïohpdiang ïa ka burom jong u.

²⁴ Naba ngi long ki briew kiba u la khot, ym tang napdeng ki Jiw hynrei napdeng ki Jentil ruh.

²⁵ Kane ka long kaei kaba u ong ha ka Kitab U Hosia: “Ki briew ki bym shym la long ki jong nga ngan khot ‘Ki Briew jong nga.’ Ka jaitbynriew kaba ngam shym la ieit ngan khot ‘Kaba ieit jong nga.’

²⁶ Bad ha kata hi ka jaka ha kaba ki la ong, ‘Phim dei ki briew jong nga.’ Hangta yn khot ïa ki, ki khun jong U Blei ba-im.”

²⁷ Bad U Isaïah u la pyrta shaphang ki Israel: “Wat lada ki paid Israel ki bun kat u shyiap harud duriaw, pynban tang khyndiat na ki yn pynim;

²⁸ naba U Trai un pyndep kloi kloi ïa ka jingainong ba-pura na ka bynta ka pyrthei.”

²⁹ Ka long kumba u Isaïah u la lah ong mynshuwa, “Lada U Trai Badonbor Baroh um shym la ieh ïa ngi katto katne kiba hiarpateng, ngin jin da la long kum ka Sodom, ngin jin da la long kum ka Gomorrah.”

Ka jingduwai u Paul na ka bynta ka Israel

³⁰ Te kumta ngi ong ba ki Jentil, ki bym shym la pyrshang ban ïasuk bad U Blei, la pynïasuk bad u lyngba ka jingngeit;

³¹ katba ki briew ki jong U Blei, kiba la wad ïa ka hukum ka ban pynlong jingïasuk bad U Blei, kim shym la shem ïa ka.

³² Bad balei kam shym la long kumta? Namar kim shym la shaniah ha ka jingngeit hynrei ha kaei kaba ki la leh. Bad kumta ki la jynthut ha “U maw jong ka jingjynthut”

³³ uba ka Jingthoh Bakhuid ka kren shaphang uta: “Ha khmih, nga buh ha Seïon ïa u maw u ban pynlong ïa ki briew ban jynthut, u mawsiang u ban pynlong ïa ki ban kyllon. Hynrei uno uno uba ngeit ha u un ym shem ïa kaba sngewsih.”