Ka Shithi U Paul Sha Ki Nong Rom 8 - Khasi CL Bible (BSI)

Ka jingim ha U Mynsiem

¹ Ym don jingpynrem shuh mynta na ka bynta kito kiba im ha U Khrist Jisu.

² Namar ka hukum jong U Mynsiem kaba wallam ka jingim ïa ngi ha U Khrist Jisu, ka la pyllait ïa nga na ka hukum jong ka pop bad ka jingïap.

³ Kaei kaba ka Hukum kam lah ban leh, namar ka jinglong ba kynja doh ka long kaba tlot, U Blei u la leh. U la pynrem ïa ka pop ha ka jinglong ba kynja doh da kaba u la phah ïa U Khun jong u hi, uba la wan kum ka jinglong u briew uba pop, ban jop ïa ka pop.

⁴ U Blei u la leh ïa kane khnang ba ïa ki jingdawa bahok jong ka Hukum yn pyndep nadong shadong ha ngi kiba im kat kum U Mynsiem, bad ym kat kum ka jinglong ba kynja doh.

⁵ Kito kiba im kumba ka jinglong ba kynja doh ka ong ïa ki ban leh, ki jingmut jingpyrkhat jong ki, ki shah pynïaid da kaei kaba ka jinglong ba kynja doh ka kwah. Kito kiba im kat kum ka jingong U Mynsiem ïa ki, ki shah pynïaid ha kaei kaba U Mynsiem u kwah.

⁶ Kaba shah synshar ha ka jinglong ba kynja doh, ka ïalam sha ka jingïap; kaba shah synshar ha U Mynsiem, ka ïalam sha ka jingim bad ka jingsuk.

⁷ Bad kumta u briew u long u nongshun jong U Blei haba u shah pynïaid ha ka jinglong ba kynja doh; namar um kohnguh ïa ka hukum U Blei, bad ha ka jingshisha um lah ban kohnguh ïa ka.

⁸ Kito kiba kohnguh ïa ki jinglong ba kynja doh, kim lah ban pynsngewbha ïa U Blei.

⁹ Hynrei phim im kumba ka jinglong ba kynja doh jong phi ka ong ïa phi ban leh; pynban, phi im kumba U Mynsiem u ong ïa phi ban leh — lada, shisha, U Mynsiem U Blei u don hapoh jong phi. Uno uno u bym don ïa U Mynsiem jong U Khrist, um long u jong u.

¹⁰ Hynrei lada U Khrist u im hapoh jong phi, U Mynsiem u long ka jingim na ka bynta jong phi namar la pynlong ka hok hapdeng jong phi bad U Blei.

¹¹ Lada U Mynsiem jong U Blei, uba la pynmihpat ïa U Jisu na ka jingïap, u im hapoh jong phi, te uta uba la pynmihpat ïa U Khrist na ka jingïap, un ai jingim ruh ïa ki met ba kynja doh jong phi da ka jingdon U Mynsiem jong u hapoh jong phi.

¹² Te kumta, ko ki parabangeit jong nga, ngi don ka kamram kaba ngi dei ban leh, hynrei kam dei ïa ngi ban im kat kum ka jingkwah jong ka jinglong ba kynja doh jong ngi.

¹³ Naba lada phi im kat kum ka jinglong ba kynja doh, phin sa ïap; hynrei lada da U Mynsiem phi pynïap noh ïa ki jingleh ka pop, phin im.

¹⁴ Kito ïa kiba la ïalam da U Mynsiem U Blei, ki long ki khun U Blei.

¹⁵ Namar U Mynsiem uba U Blei u la ai ïa phi um pynlong ïa phi ki mraw bad pynlong ïa phi ban sheptieng; pynban U Mynsiem u pynlong ïa phi ki khun jong U Blei, bad da ka bor U Mynsiem ngi pyrta sha U Blei jong ngi, “Ko Kpa! Ko Kpa jong nga!”

¹⁶ U Mynsiem jong U Blei u pynïasoh lang ïa lade bad ki mynsiem jong ngi ban pynbna ba ngi long ki khun jong U Blei.

¹⁷ Naba ngi long ki khun jong U Blei, ngin ïohkynti ïa ki jingkyrkhu kiba u buh na ka bynta ki briew jong u, bad ngin ïohkynti ruh lem bad U Khrist ïa kaei kaba U Blei u la lah buh na ka bynta jong u; naba lada ngi ïadon bynta lem ha ka jingshah shitom U Khrist, ngin ïoh ruh ban ïadon bynta ha ka burom jong u.

Ka burom ka ban sa wan

¹⁸ Nga sngew ba kaei kaba ngi shahshitom ha kane ka por kaba mynta, ym lah ban ïanujor satia bad ka burom ïa kaba yn sa pynpaw ha ngi.

¹⁹ Ki jingthaw baroh ki ap da ka jingthrang hir hir ba U Blei un pynpaw ïa ki khun jong u.

²⁰ Naba ïa ki jingthaw la pynrem ban duh noh ïa ka jingthmu jong ki, ym na ka mon la jong hi, hynrei namar ka mon U Blei uba la mon ïa kata. Pynban ka la don ka jingkyrmen

²¹ ba ïa ki jingthaw hi ha kawei ka sngi yn pyllaitluid na ki jinglongmraw sha ka jingpyut bad ban ïadon bynta ha ka jinglaitluid badonburom jong ki khun jong U Blei.

²² Naba ngi tip ba haduh ka por ba mynta, ki jingthaw baroh ki ud da ka jingpang, kum ka jingpang jong ka jingsuh kha.

²³ Hynrei ym dei tang ki jingthaw kiba ud; ma ngi ruh kiba don ïa U Mynsiem kum ki jingai banyngkong jong U Blei, ngi ïa-ud hapoh lade hi, katba ngi dang ap ïa U Blei ba un pynlong ïa ngi ki khun jong u bad ban pyllaitluid phar ïa ngi.

²⁴ Naba ka long da ka jingkyrmen ba ïa ngi la pynim; hynrei lada ngi ïohi kaei kaba ngi ap kyrmen, te kam da long shisha ka jingkyrmen. Naba uei uta uba kyrmen ïa kaei kaba u ïohi?

²⁵ Hynrei lada ngi kyrmen ïa kaei kaba ngim ïohi, ngi ap ïa kata da ka jingïaishah.

²⁶ Ha kajuh ka rukom ruh U Mynsiem u wan ban ïarap ïa ngi, ha ka jingtlot kaba ngi don. Naba ngim tip kumno ngi dei ban duwai; U Mynsiem hi da lade u ïasaid bad U Blei na ka bynta jong ngi ha ki jingud kiba ki ktien kim lah ban pynpaw.

²⁷ Bad U Blei, uba ïohi ïa kaba shapoh ki dohnud jong ngi, u tip kaei ka long jingmut jong U Mynsiem; namar U Mynsiem u ïasaid bad U Blei na ka bynta la ki briew bad kat kum ka mon jong u.

²⁸ Ngi tip ba ha kiei kiei baroh, U Blei u trei na ka bynta ka jingpynbha ïa kito kiba ieit ïa u, ïa kito ïa kiba u la khot kat kum ka jingthmu jong u.

²⁹ Kito ïa kiba U Blei u la lah jied lypa u la pynkyrpang ruh ban long kum U Khun jong u, khnang ba U Khun un long uba nyngkong hapdeng ki para.

³⁰ Bad kumta kito ïa kiba U Blei u la pynkyrpang, u la khot; bad ïa kito kiba u la khot, u la pynlong ka hok ïa ki bad u hi, bad u ai bynta ïa ki ha ka burom jong u.

Ka jingieit U Blei ha U Khrist Jisu

³¹ Halor kane baroh, kaei kaba ngi lah ban ong? Lada U Blei u long na ka bynta jong ngi, mano ba lah ban ïaleh pyrshah ïa ngi?

³² Da shisha ym U Blei, u bym shym la tyngkai wat ïa la u jong U Khun hi, hynrei uba la ai sngewbha ïa u na ka bynta jong ngi baroh! U la ai ha ngi ïa la U Khun — hato un ym ai sngewbha ïa kiei kiei baroh?

³³ Uei u ban mudui ïa kiba la jied jong U Blei? U Blei hi da lade u la pynbna ba ki long khlem pop!

³⁴ Mano te, ki ban pynrem ïa ki? Ym U Khrist Jisu, uba la ïap, lane, ïa uba la pynmihpat bad uba don ha ka liang kamon jong U Blei, uba ïasaid bad u na ka bynta jong ngi!

³⁵ Uei te, uba lah ban pynïakhlad ïa ngi na ka jingieit U Khrist? Hato ka jingjynjar ka lah, lane ka jingshitom lane ka jingpynshitom beiñ lane ka jingthngan lane ka jingduk lane ka jingma lane ka jingïap?

³⁶ Kumba ka Jingthoh Bakhuid ka ong, “Na ka bynta jong phi ngi la long ha ka jingma jong ka jingïap ha ki por baroh; la leh ïa ngi kum ïa ki langbrot ba la ïalam sha ka jingpynïap.”

³⁷ Em, ha kine baroh ngi ïoh ïa ka jingjop baroh lyngba jong uta uba la ieit ïa ngi!

³⁸ Naba nga long thikna ba ym don kaba lah ban pynïakhlad ïa ngi na ka jingieit jong u: Ym ka jingïap lymne ka jingim, lymne ki angel, lymne kiwei ki nongsynshar ba kynja bneng lane ki bor lymne jong kaba mynta lymne ka ban sa wan,

³⁹ lymne ka pyrthei shalor lymne ka pyrthei sha tbian — ym don kano kano ha ki jingthaw baroh ki ban lah lano lano ruh ban pynïakhlad ïa ngi na ka jingieit U Blei kaba ha ngi lyngba U Khrist Jisu uba U Trai jong ngi.