Ka Shithi U Paul Sha Ki Nong Rom 7 - Khasi CL Bible (BSI)

Ka nuksa na ka jingshongkurim

¹ Da shisha phin sa sngewthuh ïa kaei kaba ngan sa ong, ko ki parabangeit jong nga, namar phi baroh phi tip ïa ka hukum. Ka hukum ka synshar halor ki briew tang haba ki dang im.

² Ka kynthei ba la shongkurim, kum ka nuksa, ka shah teh da ka hukum ha la u tnga katba u dang im; hynrei haba u la ïap, te ka la laitluid na ka hukum kaba teh ïa ka bad u.

³ Kumta te, lada ka ïashong bad uwei pat u briew katba u tnga jong ka u dang im; yn khot ïa ka, ka briew kaba klim; hynrei lada u tnga jong ka u la ïap, kat kum ka aiñ ka long ka briew ba la laitluid bad kam leh ïa ka jingklim haba ka shongkurim ïa uwei pat.

⁴ Ka long kumta bad phi, ko ki parabangeit jong nga. Ha ka jingïadei bad ka hukum, ma phi ruh phi la ïap namar phi long ka bynta jong ka met U Khrist; bad mynta phi long ki jong u, uta ïa uba la pynmihpat na ka jingïap khnang ba ngi lah ban long kiba U Blei u lah ban pyndonkam na ka bynta ka kam jong u.

⁵ Naba haba ngi la im ka jinglong kum ki briew, ki jingkwah bapop ba la pynkhih da ka Hukum ki trei ha ki met jong ngi, bad baroh kaba ngi leh ka kut ha ka jingïap.

⁶ Mynta pat, ngi la lait na ka Hukum, namar ngi la ïap noh ïa kata kaba shisien ka la khum ïa ngi kum ki koidi. Ngim shakri shuh ha ka rukom barim jong ka hukum ba la thoh, hynrei ha ka rukom bathymmai jong U Mynsiem.

Ka hukum bad ka pop

⁷ Hato ngin ong te, ba ka Hukum hi ka long kaba pop? Ym kumta keiñ! Hynrei ka la long ka Hukum kaba pynlong ïa ngi ban tip kaei ka pop. Lada ka Hukum kam shym la ong, “Wat kwah ïa kaei kaba dei jong uwei pat,” ngan ym jin da la tip ïa kum kata ka jingkwah.

⁸ Hynrei da kata ka hukum, ka pop ka la ïoh ka lad ban pynkhih ïa baroh ki jait jingkwah khwan myntoi kiba ha nga. Ha bym don ka hukum, ka pop ka long kaei kaei kaba ïap.

⁹ Ma nga, shisien nga la im khlem ka hukum; hynrei haba ka hukum ka la wan, ka pop ka khie im, bad nga la ïap.

¹⁰ Bad ka hukum kaba dei ban wallam jingim, ha nga, ka la wallam ka jingïap.

¹¹ Ka pop ka la ïoh ïa ka lad, bad da ka lad jong ka hukum, ka la shukor ïa nga bad ka la pynïap ïa nga.

¹² Te kumta, ka Hukum hi ka long kaba khuid, bad ka jinghukum ka long kaba khuid, kaba dei bad kaba bha.

¹³ Hynrei hato kane ka mut ba kaei kaba bha ka pynlong ïa ka jingïap ïa nga? Ym kumta! Ka dei ka pop kaba pynlong ïa kata; da kaba pyndonkam ïa kaei kaba bha, ka pop ka la wallam ka jingïap ïa nga, khnang ba ïa kata ka jinglong bashisha jong ka pop yn pynpaw. Bad kumta, lyngba ka hukum, ïa ka pop la pynpaw ba ka long kaba kham shyrkhei.

Ka jingïaleh hapoh u briew

¹⁴ Ngi tip ba ka Hukum ka long kaba kynja mynsiem; hynrei nga long u briew uba kynja doh, ba la die kum u mraw ha ka pop.

¹⁵ Ngam shemphang kaei kaba nga leh; namar ngam leh ïa kaei kaba nga kwah ban leh, hynrei pynban nga leh ïa kaei kaba nga isih.

¹⁶ Naba kaei kaba nga leh, ka dei kaei kaba ngam kwah ban leh, kane ka pyn-i ba nga ïamynjur ba ka Hukum ka long kaba dei.

¹⁷ Kumta ngam long shisha uta uba leh ïa kane kaei kaei; pynban, ka dei ka pop kaba im hapoh jong nga.

¹⁸ Nga tip ba kaba bha kam im hapoh jong nga — kata, ha ka jinglong ba kynja doh jong nga. Naba wat la ka jingkwah ban leh ïa kaba bha ka don hapoh jong nga, ngam lah ban leh ïa ka.

¹⁹ Ngam leh ïa kaba bha kaba nga kwah ban leh; pynban, nga leh ïa kaba sniew kaba ngam kwah ban leh.

²⁰ Lada nga leh ïa kaei kaba ngam kwah ban leh, kane ka mut ba ngam long shuh uta uba leh ïa kata; pynban, ka dei ka pop kaba im hapoh jong nga.

²¹ Kumta nga shem ba kane ka hukum ka treikam; haba nga kwah ban leh ïa kaei kaba bha, kaei kaba sniew ka long tang ma ka, ka jingjied kaba nga don.

²² Ka jinglong kaba hapoh jong nga ka kmen ha ka hukum U Blei.

²³ Hynrei nga ïohi ïa ka hukum kaba pher kaba trei hapoh ka met jong nga — ka hukum kaba ïaleh pyrshah ïa ka hukum kaba ka jingmut jong nga ka mynjur. Ka pynlong ïa nga u koidi ïa ka hukum jong ka pop kaba trei ha ka met jong nga.

²⁴ A katno nga long u briew u bym don jingsuk! Uei u ban pyllait noh ïa nga na kane ka met kaba ïalam ïa nga sha ka jingïap?

²⁵ Ka jingnguh ïa U Blei, uba leh ïa kane lyngba U Jisu Khrist uba U Trai jong ngi! Kane te, ka long ka jinglong jong nga: Da lade hi nga lah ban leh ïa ka hukum U Blei tang da ka jingmut jong nga, katba ka jinglong ba kynja doh jong nga ka leh ïa hukum jong ka pop.