Ka Shithi U Paul Sha Ki Nong Rom 6 - Khasi CL Bible (BSI)

Kaba ïap ïa ka pop hynrei kaba im ha U Khrist

¹ Kaei te ngin ïa-ong? Hato ngin ïai im ha ka pop ba ka jingaiei U Blei kan nang khraw?

² Kam long kumta! Ngi la ïap ïa ka pop — kumno te ngi lah ban ïai im ha ka?

³ Naba phi tip shai ba haba la pynbaptis ïa ngi ha U Khrist Jisu, la pynbaptis ïa ngi ha ka jingïap jong u.

⁴ Da ka jingpynbaptis, ïa ngi la btep bad u, bad ngi ïadon bynta bad ka jingïap jong u, khnang ba, kumba ïa U Khrist la pynmihpat na ka jingïap da ka bor jong ka burom U Kpa, kumta ruh ma ngi, ngi lah ban im ka jingim bathymmai.

⁵ Naba naduh ba ngi la long kawei bad u ha ka jingïap kum ma u, ha kajuh ka rukom ngin ïalong kawei bad u ha ka jingmihpat kum ma u.

⁶ Bad ngi tip ba ïa ka jinglong barim jong ngi la pynïap noh bad U Khrist halor ka diengphna, khnang ba ïa ka bor jong ka jinglong pop jong ngi, yn pynjot noh, khnang ba ngin ym long shuh ki mraw jong ka pop.

⁷ Naba haba u briew u ïap, la pyllait noh ïa u na ka bor jong ka pop.

⁸ Namar ba ngi la ïap bad U Khrist, ngi ngeit ba ngin im ruh bad u.

⁹ Namar ngi tip ba ïa U Khrist la pynmihpat na ka jingïap bad un ym ïap shuh lano lano ruh — ka jingïap kan ym lah leh donbor shuh halor jong u.

¹⁰ Bad kumta, namar ba u la ïap, ka pop kan ym donbor shuh halor jong u; bad mynta u im ha ka jingïasyllok bad U Blei.

¹¹ Ha kajuh ka rukom phin pyrkhat ïa lade kum kiba la ïap, ha ka jingïadei bad ka pop, hynrei kiba im ha ka jingïasyllok bad U Blei lyngba U Khrist Jisu.

¹² Ka pop kam dei shuh ban synshar ïa ki met ki jong phi, da kaba pynkohnguh sha ki jingkwah jong ka jinglong tynrai jong phi.

¹³ Lymne ba phi dei ban pyndem ïa kano kano ka bynta jong phi sha ka pop ha ka jingpyndonkam na ka bynta ki jingthmu bymman. Pynban, phi dei ban ai ïa lade sha U Blei, kum kito ïa kiba la wallam pat na ka jingïap sha ka jingim, bad ban pyndem ha u ïa la ka jingim baroh kawei, ban pyndonkam na ka bynta ki jingthmu bahok.

¹⁴ Ka pop kam dei ban long ka kynrad jong phi; namar phim im hapoh ka hukum hynrei hapoh ka jingaiei U Blei.

Ki mraw jong ka hok

¹⁵ Kaei te ngin ïa-ong? Hato ngin leh pop, namar ngim long hapoh ka hukum hynrei hapoh ka jingaiei U Blei? Ym kumta!

¹⁶ Da shisha phi tip ba haba phi pyndem ïa lade kum ki mraw ban kohnguh ïano ïano, ha ka jingshisha, phi long ki mraw jong u kynrad uba phi kohnguh — lada ka long ka pop, kaba ka jingmih ka long ka jingïap, lane ka jingkohnguh, kaba ka jingmih ka long ka jingïasuk bad U Blei.

¹⁷ Hynrei long ka jingnguh ïa U Blei! Naba wat mynshuwa haba phi la long ki mraw jong ka pop, phi la kohnguh da la ka dohnud baroh ïa ki jingshisha ba la shem ha ka jinghikai kaba phi la ïohpdiang.

¹⁸ La pyllaitluid ïa phi na ka pop bad phi la long pat ki mraw jong ka hok.

¹⁹ (Nga pyndonkam ka ktien kaba ïakren man ka sngi namar ka jingtlot jong ka jingim tynrai jong phi.) Mynshuwa phi la pyndem ïa lade nadong shadong kum ki mraw ka jingbymkhuid bad ka jingbymman na ka bynta ki jingthmu bymman. Ha kajuh ka rukom mynta phi dei ban pyndem ïa lade nadong shadong kum ki mraw jong ka hok na ka bynta ki jingthmu bakhuid.

²⁰ Mynba phi la long ki mraw jong ka pop, phi la lait noh na ka hok.

²¹ Kaei kaba phi la ïoh jingmyntoi na kaba leh ïa kiei kiei kiba phi la sngewlehrain mynta? Ka jingmih jong kita kiei kiei ka long ka jingïap!

²² Hynrei mynta ïa phi la pyllaitluid na ka pop bad phi long ki mraw jong U Blei. Ka jingmyntoi ïa phi ka long ka jingim ba la aiti lut sha u, bad ka jingmih ka long ka jingim bymjukut.

²³ Naba ka pop ka siew ïa la ka bainong — ka jingïap; hynrei ka jingaiei jong U Blei ka long ka jingim bymjukut ha U Khrist Jisu uba U Trai jong ngi.