Ka Shithi U Paul Sha Ki Nong Rom 5 - Khasi CL Bible (BSI)

Ka jingïadei bad U Blei

¹ Mynta ngi don ka jingïadei bad U Blei lyngba ka jingngeit, ngi don ka jingïasuk bad U Blei lyngba U Jisu Khrist uba U Trai jong ngi.

² U la wallam ïa ngi da ka jingngeit sha kane ka jingshem mynsiem jong ka jingaiei U Blei, ha kaba mynta ngi im. Bad kumta ngi sngewsarong ïa ka jingkyrmen jong ka jingïadon bynta ha ka burom jong U Blei!

³ Ngi sngewsarong ruh ïa ki jingshah shitom jong ngi, namar ngi tip ba ka jingshah shitom ka pynmih ïa ka jingïaishah,

⁴ ka jingïaishah ka wallam ïa ka jingmynjur U Blei, bad ka jingmynjur jong u ka pynlong ka jingkyrmen.

⁵ Kane ka jingkyrmen ka ai ha ngi ka jingkmen, namar U Blei u la theh noh ïa ka jingieit jong u ha ki dohnud jong ngi lyngba U Mynsiem Bakhuid, uba long ka jingai sngewbha jong U Blei ïa ngi.

⁶ Namar mynba ngi dang long ki bym don jingkyrmen shuh, U Khrist u la ïap na ka bynta kiba bymman, ha ka por kaba U Blei u la jied.

⁷ Ka long kaei kaei kaba eh ïa uno uno ban ïap na ka bynta u briew uba hok. Ka lah ban long ba don uno uno uba nud ban ïap na ka bynta u briew uba bha.

⁸ Hynrei U Blei u la pyn-i ha ngi haduh katno ba u ieit ïa ngi — ka la long mynba ngi dang long ki nongpop ba U Khrist u la ïap na ka bynta jong ngi!

⁹ Da ka jingïap ba aiti lut jong u, mynta la pynlong ka jingïadei hapdeng jong ngi bad U Blei; katno tam te, ngin long kiba lait im da u na ka jingbitar U Blei!

¹⁰ Ngi la long ki nongshun jong U Blei, hynrei u la pynlong ïa ngi ki paralok jong u lyngba ka jingïap U Khun jong u. Mynta ba ngi long ki paralok jong U Blei, katno tam ba yn pynim ïa ngi da ka jingim U Khrist!

¹¹ Hynrei kam long tang kumta; ngi lehkmen na ka bynta kaei kaba U Blei u la leh lyngba U Jisu Khrist uba U Trai jong ngi, uba mynta u la pynlong ïa ngi ki paralok jong U Blei.

U Adam bad U Khrist

¹² Ka pop ka la wan sha ka pyrthei lyngba uwei u briew, bad ka pop jong u ka la wallam ryngkat bad ka ïa ka jingïap. Ka jingmih ka long, ba ka jingïap ka la pur sha u bynriew baroh namar uwei pa uwei u la leh pop.

¹³ La don ka pop ha ka pyrthei shuwa ba yn ai ïa ka Hukum; hynrei hangno ha bym don ka hukum, ym don jingbuh jingkynmaw ïa ki pop.

¹⁴ Hynrei naduh ka por jong u Adam haduh ka por jong u Moses, ka jingïap ka synshar halor u bynriew baroh, wat halor kito ki bym shym la leh pop ha ka rukom kumba u Adam u la leh mynba um shym la kohnguh ïa ka hukum U Blei. U Adam u la long ka dur jong uta u ban sa wan.

¹⁵ Hynrei kine ar kim long kumjuh, namar ka jingai sngewbha jong U Blei kam long kum ka pop u Adam. Ka long kaba shisha ba bun ki briew ki la ïap namar ka pop jong uta uwei u briew. Hynrei ka jingaiei U Blei ka long kham khraw, bad kumta ruh ka jingai sngewbha ïa kiba bun ki briew lyngba ka jingaiei jong uta uwei u briew, U Jisu Khrist.

¹⁶ Bad ka don ka jingïapher hapdeng ka jingai sngewbha U Blei bad ka pop jong uwei u briew. Hadien jong kata kawei ka pop, la wan ka jingbishar ïa “Kiba pop;” hynrei hadien ki pop kiba bun bah, ka wan ka jingai sngewbha kaba ngim don hok, ka jong “Uba khlem pop!”

¹⁷ Ka long ka jingshisha ba lyngba ka pop jong uwei u briew, ka jingïap ka la sdang ban synshar, namar jong uta uwei u briew. Hynrei katno kaba kham khraw ka long ka jingmih jong kaei kaba la leh da uwei u briew, U Jisu Khrist! Baroh kiba ïohpdiang ïa jingaiei bakyrhai U Blei bad ba la pynïasuk bad u kin synshar ha ka jingim lyngba U Khrist.

¹⁸ Kumta te, kumba da kawei ka pop la pynrem ïa u bynriew baroh, ha kajuh ka rukom kawei ka kam bahok ka pyllait bad ka ai jingim ïa u bynriew baroh.

¹⁹ Bad kumba ïa baroh ki briew la pynlong ki nongpop na ka daw jong ka jingbymkohnguh jong uwei u briew, ha kajuh ka rukom yn pynïasuk ïa ki baroh bad U Blei na ka daw jong ka jingkohnguh jong uwei u briew.

²⁰ Ïa ka Hukum la pynmih khnang ban pynbun ïa ka jingleh bymdei; hynrei haba ka pop ka man bun, ka jingaiei U Blei ka nang kham khraw.

²¹ Te kumta, kumba ka pop ka synshar da ka jingïap, kumta ruh ka jingaiei U Blei ka synshar da ka hok, ka ïalam ïa ngi sha ka jingim bymjukut lyngba U Jisu Khrist U Trai jong ngi.