Ka Shithi U Paul Sha Ki Nong Rom 4 - Khasi CL Bible (BSI)

Ka nuksa u Abraham

¹ Kaei kaba ngin ïa-ong te, shaphang u Abraham, u kpa jong ka jaitbynriew jong ngi? Kaei ka jingshem jong u?

² Lada ïa u la ñiew ka hok bad U Blei da kiei kiba u la leh, un don ei ei ban sngewsarong shaphang kata — hynrei ym ha khmat U Blei.

³ Ka Jingthoh Bakhuid ka ong, “U Abraham u la ngeit ha U Blei, bad namar ka jingngeit jong u, U Blei u la pdiang ïa u kum uba hok.”

⁴ Ïa u briew uba trei, la siew bainong ïa u, hynrei ym shym la ñiew ïa ka kum ka jingai sngewbha; ka long kaei kaei kaba u la kamai.

⁵ Hynrei u briew uba shaniah ha ka jingngeit jong u, ym ha ki kam jong u, bad uba ngeit ha U Blei uba pynbna ïa uba la rem, ban long uba lui lui, ka long ka jingngeit jong u ba U Blei u pdiang khnang ban pynlong hok ïa uta u briew bad u hi.

⁶ Kane ka long kaei kaba u Dabid u la mut mynba u la kren shaphang ka jingsuk jong u briew ïa uba U Blei u pdiang kum uba hok, lait noh na kano kano kaba u briew u leh:

⁷ “Suk kita ïa kiba la map noh ïa ki jingleh bymdei, kiba ïa ki pop la map noh!

⁸ Suk u briew uba ïa ki pop jong u, U Trai un ym buh jingkynmaw shuh!”

⁹ Hato kane ka jingsuk kaba U Dabid u la kren ka long tang ïa kito ïa kiba la otsher? Ym kumta keiñ! Ka long ruh ïa kito ki bym shym la otsher. Naba ngi ong na ka Jingthoh Bakhuid, “U Abraham u la ngeit ha U Blei, bad namar ka jingngeit jong u, U Blei u la pdiang ïa u kum uba hok.”

¹⁰ Mynno kane ka la jia? Hato ka la long ha shuwa ne hadien ba la otsher ïa u Abraham? Ka la long ha shuwa ym hadien.

¹¹ Ïa u la otsher hadien, bad ka jingotsher ïa u ka la long ka dak ban pyn-i ba namar ka jingngeit jong u, U Blei u la pdiang ïa u kum uba hok shuwa ban otsher ïa u. Bad kumta u Abraham u long u kpa ba kynja mynsiem jong baroh kiba ngeit ha U Blei bad ïa kiba la pdiang kum kiba hok da u, wat la ïa ki ym shym la otsher.

¹² U long ruh u kpa jong kito ïa kiba la otsher, kata, jong kito kiba, nalor ba la otsher ïa ki, ki la im ruh ïa kajuh ka jingim jong ka jingngeit kaba u Abraham u kpa jong ngi u la im shuwa ba yn otsher ïa u.

Ïa ka jingkular U Blei la ïohpdiang lyngba ka jingngeit

¹³ Mynba U Blei u la kular ïa u Abraham bad kiba hiarpateng na u ba ka pyrthei kan long ka jong u, u la leh kumta, ym namar ba U Abraham u la kohnguh ïa ka Hukum, hynrei namar u la ngeit bad la ñiew ïa u, uba hok da U Blei.

¹⁴ Naba lada kaei kaba U Blei u kular ban ai ha kito kiba kohnguh ïa ka Hukum, te ka jingngeit u briew kam don jingmut bad ka jingkular U Blei kam dondor ei ei.

¹⁵ Ka Hukum ka pynjem ïa ka jingbitar U Blei; hynrei hangno hangno ka ha bym don ka Hukum, ym don ka jingbymkohnguh ïa ka hukum.

¹⁶ Bad kumta ïa ka kular la pynshong nongrim ha ka jingngeit, khnang ba ïa ka jingngeit yn pynthikna kum ka jingai sngewbha jong U Blei ïa baroh kiba hiarpateng na u Abraham — ym tang ïa kito kiba ngeit ïa ka Hukum, hynrei ïa kito ruh kiba ngeit kumba u Abraham u la leh. Namar u Abraham u long u kpa ba kynja mynsiem jong ngi baroh;

¹⁷ kumba ka Jingthoh Bakhuid ka ong, “Nga la pynlong ïa me u kpa jong ki jaitbynriew babun.” Kumta ka jingkular ka long kaba bha ha khmat U Blei, ha uba u Abraham u la ngeit — U Blei uba wallam ïa kiba la ïap sha ka jingim bad uba ka hukum jong u ka pynlong ïa kaei ka bym shym la don.

¹⁸ U Abraham u la ngeit bad u la kyrmen, wat mynba ym shym don ka daw ban kyrmen, bad kumta u la long “U kpa jong ki jaitbynriew babun.” Kumba ka Jingthoh Bakhuid ka ong, “Kiba hiarpateng na me kin bun kat ki khlur.”

¹⁹ Ha kata ka por u la jan dap shispah snem ka rta; hynrei ka jingngeit jong u kam shym la tlot haba u la pyrkhat ïa la ka met, kaba la lah long kum kaba la ïap, lane ïa ka jingshisha ba ka Sarah kam lah ïoh khun shuh.

²⁰ Ka jingngeit jong u kam shym la mihnoh na u, bad um shym la artatien ïa ka jingkular U Blei; ka jingngeit jong u ka la pyndap ïa u da ka bor, bad u ai ka jingïaroh ïa U Blei.

²¹ U la thikna bha ba U Blei un leh ïa kaei kaba u la kular.

²² Dei na kata ka daw balei ba ïa u Abraham, lyngba ka jingngeit, “La pdiang kum uba hok da U Blei.”

²³ Ïa ki ktien “La pdiang kum uba hok” ym shym la thoh tang na ka bynta jong u marwei.

²⁴ La thoh ïa ki na ka bynta jong ngi ruh ïa kiba la pdiang kum kiba hok, kiba ngeit ha uta uba la pynmih na ka jingïap ïa U Jisu uba U Trai jong ngi.

²⁵ Na ka bynta ki pop jong ngi, la aiti ïa u ban ïap, bad ïa u la pynmihpat khnang ban pynlong ka hok ïa ngi bad U Blei.