Ka Shithi U Paul Sha Ki Nong Rom 3 - Khasi CL Bible (BSI)

¹ Hato ki Jiw te ki don ha kano kano ka jingmyntoi ban ïa ki Jentil? Lane hato don kano kano ka dor ha ka jingotsher?

² Ha ka jingshisha, don shibun, ha kiba bun ki liang! Ha kaba nyngkong, U Blei u la aiti ïa ka khubor jong u ha ki Jiw.

³ Hynrei kumno lada katto katne na ki kim long kiba ïaineh? Hato kane ka mut ba U Blei un ym long uba ïaineh?

⁴ Kan ym long kumta! U Blei un long uba shisha, wat la uwei pa uwei u briew u long uba shukor. Kumba ka Jingthoh Bakhuid ka ong, “Ba yn lah ban pyn-i ïa phi ba phi long kiba shisha haba phi kren; phi dei ban jop ïa ka jingïaleh haba la bishar ïa phi.”

⁵ Hynrei kaei ka ban long lada ka jingleh bymdei jong ngi ka pyn-i kham shai ïa kaei kaba dei kaba U Blei u leh? Hato ngi lah ban ong ba U Blei u bakla haba u pynshitom ïa ngi? (Kane kan long ka jingkylli kaba dei ban kylli.)

⁶ Ym kumta keiñ! Lada U Blei um long uba hok, kumno un bishar ïa ka pyrthei?

⁷ Hynrei kaei ka ban long lada ka jingbymshisha jong nga ka pynlong ïa ka burom U Blei da kaba pynlong ïa ka jingshisha jong u ban kham paw shai? Balei yn dang ïai pynrem ïa nga kum u nongpop?

⁸ Balei yn ym ong te, “To ngin leh ïa kaba sniew khnang ba kaba bha kan mih?” Katto katne ngut ki briew, shisha, ki pynjahburom ïa nga da kaba pharep ïa nga da kaba ong ïa kane kaei kaei hi! Kin shah pynrem, kumba ki dei ban shah.

Ym don uba hok

⁹ Haba kumta, hato ma ngi ki Jiw ngi don ha kano kano ka bynta kaba kham bha ban ïa ki Jentil? Ym kumta! Nga la lah pyn-i ba ki Jiw bad ki Jentil ki long kumjuh baroh hapoh ka bor jong ka pop.

¹⁰ Kumba ki Jingthoh Bakhuid ki ong: “Ym don uno uno uba hok,

¹¹ ym don uno uno uba stad lane uba mane ïa U Blei.

¹² Baroh ki la phai noh na U Blei; baroh ki la leh bym dei; ym don uno uno uba leh ïa kaba dei, ym don uwei ruh.

¹³ Ki ktien jong ki, ki dap da ki jingshukor bashyrkhei; ki jingthok ba-bymman ki mih na ki thylliej jong ki, bad ki jingbyrngem kiba ma, kum ka bih bseiñ, na ki rmiang shyntur jong ki;

¹⁴ ka jingkren jong ki ka dap da ki jingtim bakthang.

¹⁵ Ki long kiba kloi ban pynmynsaw bad ban pynïap;

¹⁶ ki ieh ka jingjot bad ka jingpynjot shano shano ba ki leit.

¹⁷ Kim shym la tip ïa ka lynti jong ka jingsuk,

¹⁸ lymne ki la ïoh jinghikai ïa ka jingtiengburom ïa U Blei.”

¹⁹ Mynta ngi tip ba kiei kiei baroh ha ka Hukum ki dei ïa kito kiba im hapoh ka Hukum, khnang ban pynsangeh ïa baroh ki jingaidaw jong ki briew bad wallam ïa ka pyrthei baroh kawei hapoh ka jingbishar U Blei.

²⁰ Naba ym don uno uno ruh uba hok ha khmat U Blei da kaba leh ïa kaei kaba ka Hukum ka dawa; kaei kaba ka Hukum ka leh ka long ban pynlong ïa u briew ban tip ba u la leh pop.

Kumno U Blei u pynlong ïa ngi ka hok bad u

²¹ Hynrei mynta ïa ka rukom ba U Blei u buh ba ki briew kin long ka hok bad u hi, la pynpaw. Kam don jingïadei ei ei bad ka Hukum, wat la ka Hukum u Moses bad ki nongïathuhlypa ki la ai ka jingsakhi ïa ka.

²² U Blei u pynlong ka hok bad ki briew lyngba ka jingngeit jong ki ha U Jisu Khrist. U Blei u leh ïa kane ïa baroh kiba ngeit ha U Khrist, namar ym don satia kano kano ka jingïapher:

²³ baroh ki la leh pop bad ki la jngai noh na ka jingpynim U Blei.

²⁴ Hynrei da ka jingaiei U Blei, ïa baroh la pynlong ka hok bad u lyngba U Khrist Jisu, uba pyllaitluid ïa ki.

^25-26 U Blei u la ai ïa u, khnang ba da ka jingïap kum ka jingkñia, un long ka lad jong ka jingmap ïa ki pop jong ki briew lyngba ka jingngeit jong ki ha u. U Blei u la leh ïa kane khnang ban pyn-i ba u long uba hok. Mynshuwa, u la ïaishah bad u la peit lyndet ïa ki pop jong ki briew; hynrei ha ka por mynta u pynbeit ïa ki pop jong ki, khnang ban pyn-i ïa ka jinglonghok jong u. Ha kane ka rukom U Blei u pyn-i ba ma u hi u long uba hok bad ba u pynlong hok ïa baroh kiba ngeit ha U Jisu.

²⁷ Ïa kaei te, ngi lah ban sngewsarong? Yn don ei ei! Bad kaei ka daw na ka bynta kane? Hato ka dei ba ngi kohnguh ïa ka Hukum? Em, hynrei ka dei ïa kata kaba ngi ngeit.

²⁸ Naba ngi pynkut ba u briew u don ka jinglonghok bad U Blei tang lyngba ka jingngeit, bad ym da kaba leh ïa kaei kaba ka Hukum ka dawa.

²⁹ Lane ba U Blei u long U Blei tang jong ki Jiw? Hato um dei U Blei jong ki Jentil ruh? Da shisha u dei.

³⁰ U Blei u long tang uwei, bad un pynlong ha lade hi ka hok bad ki Jiw halor ka nongrim jong ka jingngeit jong ki, bad un pynlong ka hok bad ki Jentil lyngba ka jingngeit jong ki.

³¹ Hato kane ka mut ba da kane ka jingngeit ngi kyntait noh ïa ka Hukum? Em, ym kumta; pynban, ngi pynskhem ïa ka Hukum.