Ka Shithi U Paul Sha Ki Nong Rom 2 - Khasi CL Bible (BSI)

Ka jingbishar U Blei

¹ Hato, ko paralok jong nga, phi bishar ïa kiwei pat? Phim lah lait satia, lada phi long uei uei ruh. Namar haba phi bishar ïa kiwei bad nangta phi leh ïa kijuh kiei kiei kiba ki leh, phi pynrem ïa lade.

² Ngi tip ba U Blei u leh ïa kaba dei haba u bishar ïa ki briew kiba leh ïa kiei kiei kum kine.

³ Hynrei ma phi, ko paralok jong nga, leh ïa kita kiei kiei hi kiba phi bishar ïa kiwei! Hato phi pyrkhat phin lait na ka jingbishar U Blei?

⁴ Lane lehse phi ibeiñ ïa ka jingsbun bakhraw jong u, ka jingshah laitluid, bad ka jingïaishah. Da shisha phi tip ba U Blei u long uba sbun, namar u pyrshang ban ïalam ïa phi ban kylla-kaba-mut.

⁵ Hynrei phi don ka dohnud kaba eh bad kaba kuman, bad kumta phi pynlong ka jingpynshitom ïa lade hi wat kham khraw ha ka Sngi ha kaba ïa ka jingbitar U Blei bad ki jingbishar bahok yn pynpaw.

⁶ Naba U Blei un ainong ïa uwei pa uwei kat kum kaei kaba u la leh.

⁷ Katto katne ki briew ki ïai leh ïa kaba bha, bad wad burom, ka nam babha, bad ka jingim bymïap shuh; ïa ki U Blei un ai ka jingim bymjukut.

⁸ Kiwei pat ki briew ki long kiba khwan myntoi bad kiba kyntait ïa kaei kaba dei, khnang ban bud ïa kaei ka bym dei; halor jong ki U Blei un theh noh ïa la ka jingbitar bad ka jingbitar shla.

⁹ Yn don ka jingjynjar bad ka jingpang na ka bynta kito baroh kiba leh ïa kaei kaba sniew, na ka bynta ki Jiw nyngkong bad na ka bynta ki Jentil ruh.

¹⁰ Hynrei U Blei un ai ka burom, ka nam babha bad ka jingsuk ïa baroh kiba leh ïa kaei kaba bha, ïa ki Jiw nyngkong bad ïa ki Jentil ruh.

¹¹ Naba U Blei u bishar ïa baroh da kajuh ka jingbishar.

¹² Ki Jentil kim don ka Hukum u Moses; ki leh pop bad bakla lynti khlem ka Hukum. Ki Jiw ki don ka Hukum; ki leh pop bad shah bishar da ka Hukum.

¹³ Naba ym dei da kaba ïohsngew ïa ka Hukum ba ki briew ki don ka jingïadei bad U Blei, hynrei da kaba leh ïa kaei kaba ka Hukum ka dawa.

¹⁴ Ki Jentil kim don ïa ka Hukum; hynrei haba ki leh da ka jingsngewthuh ha lade ïa kaei kaba ka Hukum ka dawa, ki long ka hukum ïa lade, wat la kim don ka Hukum.

¹⁵ Ka jingleh jong ki ka pyn-i ba ïa kaei kaba ka Hukum ka dawa, la thoh ha ki dohnud jong ki. Ki jingïatiplem jong ki ruh ki pyn-i ba kane ka long kaba shisha, namar ki jingpyrkhat jong ki teng teng ki pynrem ïa ki bad teng teng ki kyrshan ïa ki.

¹⁶ Bad kumta, kat kum ka Khubor Babha kaba nga ïalap, kane ka dei kaba kumno ka long ha kata ka Sngi ha kaba U Blei lyngba U Jisu Khrist un bishar ïa ki jingmut barieh jong ki briew baroh.

Ki Jiw bad ka Hukum

¹⁷ Kumno shaphang jong phi? Phi khot ïa lade u Jiw; phi shaniah ha ka Hukum bad sngewsarong shaphang U Blei;

¹⁸ phi tip kaei kaba U Blei u kwah ïa phi ban leh, bad phi ïoh jinghikai na ka Hukum ban jied ïa kaei kaba dei;

¹⁹ phi thikna ba phi long u nongïalam ïa uba matlah, ka jingshai ïa kito kiba ha ka jingdum,

²⁰ u nongbthah ïa kiba bieit, bad u nonghikai ïa ki bym don jingnang jingstad. Phi long thikna ba ha ka Hukum phi don ka thup ba-pura jong ka jingtip bad jong ka jingshisha.

²¹ Phi hikai ïa kiwei pat — balei phim hikai ïa lade? Phi ïalap, “Wat tuh” — hynrei phi hi phi tuh?

²² Phi ong, “Wat klim” — hynrei phi klim? Phi isih ïa ki bleithaw — hynrei phi lute ha ki templ?

²³ Phi sngewsarong ba phi don ka Hukum U Blei — hynrei hato phi wallam ka jinglehrain ïa U Blei da kaba pynkheiñ ïa ka Hukum jong u?

²⁴ Ka Jingthoh Bakhuid ka ong, “Na ka daw jong phi ki Jiw, ki Jentil ki kren sniew ïa U Blei.”

²⁵ Lada phi kohnguh ïa ka Hukum, ka jingotsher jong phi ka don ka dor; hynrei lada phim kohnguh ïa ka Hukum, kan jin da la bha ba phim shym la shah otsher.

²⁶ Lada u Jentil, u bym shym la otsher, u kohnguh ïa ki jingdawa ka Hukum, hato U Blei un ym ñiew ïa u kumba u la dep otsher?

²⁷ Bad kumta ma phi ki Jiw phin shah pynrem ha ki Jentil namar phi pynkheiñ ïa ka Hukum, wat la na ka bynta jong phi ïa ka Hukum la thoh bad ïa phi la otsher; hynrei ki kohnguh ïa ka Hukum, wat la ym shym la otsher ïa ki ha ka doh.

²⁸ Haba kumta, uei uba dei u Jiw bashisha, ba la otsher shisha? Ym dei uta u briew uba dei u Jiw ha kaba shabar, uba ka jingotsher ka long ha ka doh.

²⁹ Pynban, u Jiw bashisha u dei u briew uba dei u Jiw ha kaba shapoh, kata, uba ïa ka dohnud jong u la otsher, bad kane ka dei ka jingtrei jong U Mynsiem jong U Blei, ym jong ka Hukum ba la thoh. Kum uta u briew u ïoh ïa la ka jingïaroh na U Blei, ym na u briew.