Ka Shithi U Paul Sha Ki Nong Rom 16 - Khasi CL Bible (BSI)

Ki jingai khublei

¹ Nga phah sha phi, da kaba sngewburom ïa ka parabangeit jong ngi, ka Phibi, kaba shakri ïa ka balang ha Kenkhria.

² To pdiang ïa ka ha ka kyrteng U Trai, kumba ki briew jong U Blei ki dei ban leh, bad to ai ha ka ïa kano kano ka jingïarap kaba ka lah ban donkam na phi; namar ma ka hi, da lade ka long ka paralok babha ïa kiba bun ki briew bad ïa nga ruh.

³ Nga phah ïa ki jingkhublei ïa ka Priskila bad u Akwila, ki para nongtrei jong nga ha ka jingshakri ïa U Khrist Jisu;

⁴ kiba la kheiñduh ïa la ka jingim na ka bynta jong nga. Nga dap da ka jingsngewnguh ïa ki — ym tang ma nga, hynrei baroh ki balang Jentil kumjuh.

⁵ Ki jingkhublei ruh ïa ka balang kaba ïaseng ha ka ïing jong ki. Ki jingkhublei ïa u paralok ba-ieit jong nga u Epainetos, uba long u rangbah uba nyngkong ha ka probins jong ka Asia ban ngeit ha U Khrist.

⁶ Ki jingkhublei ïa ka Mari, kaba la trei shitom na ka bynta jong phi.

⁷ Ki jingkhublei ruh ïa u Andronikos bad ka Junias, ki para Jiw kiba la ïadon lang bad nga ha byndi; ki long ïa kiba la ithuh bha hapdeng ki apostol, bad ki la long Khristan shuwa ïa nga.

⁸ Ki jingkhublei jong nga ïa u Ampliatos, u paralok ba-ieit jong nga ha ka jingïasyllok U Trai.

⁹ Ki jingkhublei ruh ïa u Urbanos, uba ïatrei lem bad ngi ha ka kam U Khrist, bad ïa u Stakhos, u paralok ba-ieit jong nga.

¹⁰ Ki jingkhublei ïa u Apelles, uba ïa ka jingïaineh ha U Khrist la pynshisha. Ki jingkhublei ïa kito kiba na ka longïing jong u Aristobulos.

¹¹ Ki jingkhublei ïa u Herodion, u para Jiw, bad ïa ki parabangeit kiba ha ka longïing jong u Narkissos.

¹² Ki jingkhublei jong nga ïa ka Truphina bad ka Truphosa, kiba trei ha ka kam U Trai bad ïa ka paralok ba-ieit jong nga, ka Persis, kaba la trei shibun ka kam na ka bynta U Trai.

¹³ Nga phah ki jingkhublei ïa u Ruphos, u nongtrei bapawkhmat ha ka kam U Trai, bad ïa ka kmie jong u, kaba la ñiew ïa nga kum ïa u khun.

¹⁴ Ki jingkhublei jong nga ïa u Asynkritos, u Phlegon, u Hermes, u Patrobas, u Hermas, bad baroh ki parabangeit kiba don bad ki.

¹⁵ Ki jingkhublei ïa u Philologos bad ka Julia, ïa u Nireus bad ka para jong u, ïa u Olumpas bad ïa ki briew jong U Blei baroh kiba ïadon bad ki.

¹⁶ To ïakhublei iwei ïa iwei da ka jingïadoh parabangeit. Baroh ki balang jong U Khrist ki phah ki jingkhublei jong ki ïa phi.

Ki jingbthah bakhatduh

¹⁷ Nga kyntu ïa phi, ko ki parabangeit jong nga: To da husiar na kito kiba pynlong ki jingïapait bad kiba pynkulmar ïa ka jingngeit jong ki briew bad kiba ïaid pyrshah ïa ka jinghikai kaba phi la ïoh. To kiar na ki!

¹⁸ Naba kito kiba leh kum ïa kita kiei kiei kim shakri ïa U Khrist uba U Trai jong ngi, hynrei ïa ki jingkwah jong ki hi. Da ki ktien jali ja-um bad ka jingkren pynroh, ki shukor ïa ki briew kiba lui lui.

¹⁹ Baroh ki la ïohsngew ïa ka jingïaineh jong phi ha ka gospel, bad na ka bynta kane, nga sngewkmen shibun shaphang jong phi. Nga kwah ïa phi ban long kiba stad shaphang kaei kaba bha, hynrei ban long lui lui ha kaei kaba sniew.

²⁰ Bad U Blei, uba long ka tyllong jong ka jingsuk jong ngi, shen un pynlwet ïa u Soitan hapoh ki kjat jong phi. To ka jingaiei jong U Jisu uba U Trai jong ngi kan long lem bad phi.

²¹ U Timothi, u para nongtrei jong nga, u phah ïa phi ki jingkhublei; bad kumjuh ruh u Lukios, u Jason, bad u Sosipater kiba long ki para Jiw.

²² Ma nga, u Tertios, uba thoh ïa kane ka shithi, nga phah ïa phi ki jingkhublei parabangeit.

²³ U Gaïos, uba ai jaka sah ïa nga, uba ha ka ïing jong u ka balang ka ïaseng, u phah ïa phi ki jingai khublei; u Erastos, u nongsumar ïa ki jingkynshew ha ka nongbah, bad u Kuartos, u parabangeit jong ngi, ki phah ïa ki jingkhublei jong ki.

²⁴ To ka jingaiei U Jisu Khrist uba U Trai jong ngi kan long lem bad phi baroh. Amen.

Ka jingduwai jingïaroh

²⁵ To ngin ai ka burom ïa U Blei! U long uba lah ban pynlong ïa phi kiba ïeng skhem ha ka jingngeit jong phi, kat kum ka Khubor Babha kaba nga ïalap shaphang U Jisu Khrist bad kat kum ka jingpynpaw ïa ka jingshisha barieh, ïa kaba la buhrieh la slem bah mynshuwa.

²⁶ Mynta pat, ïa kata ka jingshisha la pynmih ha kaba paw lyngba ki jingthoh jong ki nongïathuhlypa; bad da ka hukum jong U Blei bymjukut, ïa ka la pyntip sha baroh ki jaitbynriew, khnang ba baroh ki lah ban ngeit bad kohnguh.

²⁷ Ha U Blei uba long tang ma u, uba tang ma u marwei uba stad baroh, to long ka burom lyngba U Jisu Khrist junom! Amen.