Ka Shithi U Paul Sha Ki Nong Rom 15 - Khasi CL Bible (BSI)

Pynsngewbha ïa kiwei, ym ïa lade

¹ Ma ngi kiba long kiba khlaiñ ha ka jingngeit, ngi dei ban ïarap ïa kiba tlot ba kin bah ïa ki jingkit jong ki. Ngim dei ban pynsngewbha ïa lade.

² Pynban, ma ngi baroh, ngi dei ban pynsngewbha ïa ki parabangeit jong ngi na ka bynta ka jingbha jong ki, khnang ban tei ïa ki ha ka jingngeit.

³ Naba U Khrist um shym la pynsngewbha ïa lade. Pynban, kumba ka Jingthoh Bakhuid ka ong, “Ki jingkrenbeiñ ïa kiba la thew ha phi ki la hap halor jong nga.”

⁴ Ïa kiei kiei ba la thoh ha ki Jingthoh Bakhuid, la thoh ban hikai ïa ngi, khnang ba ngin don ïa ka jingkyrmen lyngba ka jingïaishah bad ka jingpynshlur kiba ki Jingthoh Bakhuid ki ai ïa ngi.

⁵ Bad to U Blei, uba long ka tyllong jong ka jingïaishah bad ka jingpynshlur, un pynlah ïa phi ban don kajuh ka jingmut hapdeng jong phi da kaba bud ïa ka nuksa U Khrist Jisu,

⁶ khnang ba ma phi baroh lang, phi lah ban ïaroh da kawei ka sur ïa U Blei bad U Kpa jong U Jisu Khrist uba U Trai jong ngi.

Ka Khubor Babha na ka bynta ki Jentil

⁷ To ïa-pdiang iwei ïa iwei te, na ka bynta ka burom jong U Blei, kumba U Khrist u la pdiang ïa phi.

⁸ Naba nga ong ïa phi ba ka jingim jong ka jingshakri U Khrist ka la long na ka bynta ki Jiw, ban pyn-i ba U Blei u long uba ïaineh, ban pynlong ïa ki kular jong u ha ki kpa tymmen jong ki ban urlong shisha,

⁹ bad ban pynlah wat ïa ki Jentil ban ïaroh ïa U Blei na ka bynta ka jingisynei jong u. Kumba ka Jingthoh Bakhuid ka ong, “Bad kumta ngin ïaroh ïa me hapdeng ki Jentil; ngan rwai ki jingïaroh ïa me.”

¹⁰ Ka ong biang, “Shadkmen, ko ki Jentil, ryngkat bad ki briew jong U Blei!”

¹¹ Shuh shuh ka ong, “Ïaroh ïa U Trai, ko ki Jentil baroh; ïaroh ïa u, ko ki jaitbynriew baroh!”

¹² Nangta, u Isaïah u ong, “Uba hiarpateng na u Jesse un wanpaw; un wan ban synshar ïa ki Jentil, bad kin buh ïa ka jingkyrmen jong ki ha u.”

¹³ To U Blei, uba long ka tyllong jong ka jingkyrmen, un pyndap ïa phi da ka jingkmen baroh bad ka jingsuk kaba long da ka jingngeit jong phi ha u, khnang ba ka jingkyrmen jong phi kan ïai san da ka bor jong U Mynsiem Bakhuid.

Ka daw ba u Paul u thoh kham shlur

¹⁴ Ko ki parabangeit jong nga: Nga hi nga sngewskhem ba phi dap da ka jingbha, ba phi don ka jingtip baroh, bad ba phi lah ban hikai iwei ïa iwei pat.

¹⁵ Hynrei ha kane ka shithi nga la kren kham shlur shaphang katto katne ki phang kiba nga la pynkynmaw ïa phi. Nga la shlur namar ka kabu ba U Blei u la ai ïa nga ban long u shakri jong U Khrist Jisu ban trei na ka bynta ki Jentil.

¹⁶ Nga shakri kum u lyngdoh ha kaba ïalap ïa ka Khubor Babha na U Blei, khnang ba ki Jentil ki lah ban long ka jingkñia ba la pdiang sha U Blei, ba la pynkyntang sha u da U Mynsiem Bakhuid.

¹⁷ Te ha U Khrist Jisu, nga lah ban sngewsarong ïa ka jingshakri jong nga ïa U Blei.

¹⁸ Ngan long shlur bad ngan kren tang shaphang kaei kaba U Khrist u la leh lyngba jong nga, ban ïalam ïa ki Jentil ban kohnguh ïa U Blei. U la leh ïa kane da ki ktien bad ki kam,

¹⁹ da ka bor jong ki kambah bad ki jingphylla, bad da ka bor jong U Mynsiem jong U Blei. Bad kumta, ha ka jingleit baroh shi lynter lynti naduh Jerusalem sha Illyrikom, nga la pynbna pura ïa ka Khubor Babha shaphang U Khrist.

²⁰ Ka jingangnud jong nga borabor ka long ban pynbna ïa ka Khubor Babha ha ki jaka ha kiba ïa U Khrist ym pat shym la ïohsngew, khnang ban ym tei halor ka nongrim ba la seng da kiwei pat.

²¹ Kumba ka Jingthoh Bakhuid ka ong, “Ïa kito ha kiba ym pat shym la ïathuh shaphang jong u kin ïohi, bad kito ki bym pat shym la ïohsngew kin sngewthuh.”

Ka jingthmu u Paul ban leit sha Rom

²² Bad kumta la khanglad ïa nga bunsien na kaba wan sha phi.

²³ Hynrei mynta ba nga la pyndep ïa ka jingtrei ha kine ki thain bad namar ba nga la ju kwah la bun snem ban wan khmih ïa phi, nga kyrmen ban leh kumta mynta.

²⁴ Nga kwah ban ïakynduh ïa phi ha ka jingleit lynti artat jong nga sha Spain, bad ba phin ïarap ïa nga ha ka jingleit jong nga shata, hadien ba nga la sngewhun ban sah shipor ha ka jingwan khmih ïa phi.

²⁵ Pynban ïa mynta, nga leit sha Jerusalem ha ka jingshakri ïa ki briew jong U Blei hangta.

²⁶ Namar ki balang ha Makedonia bad Akhaïa da ka jingsngewlaitluid ki la ïakut ban ai ka jingai ban ïarap ïa kiba duk napdeng ki briew jong U Blei ha Jerusalem.

²⁷ Kata ka jingïakut ka la long ka jong ki hi; hynrei ha ka jingshisha, ki la don ïa ka jingsngew kit ram ban ïarap ïa ki. Namar ki Jiw ki la ïasam bynta lem ïa ki jingkyrkhu ba kynja mynsiem jong ki bad ki Jentil, ki Jentil ki dei ban pyndonkam ïa ki jingkyrkhu ba ki don ban ïarap ïa ki Jiw.

²⁸ Haba nga la pyndep ïa kane ka kam bad ba nga la dep aiti sha ki ïa baroh ka pisa ïa kaba la dep pynmih na ka bynta jong ki, ngan sa mih ban leit sha Spain bad wan khmih artat ïa phi ha ka jingleit lynti shata.

²⁹ Haba ngan wan sha phi, nga tip ba ngan wan ryngkat bad ka jingkyrkhu ba-dap jong U Khrist.

³⁰ Nga kyntu ïa phi, ko ki parabangeit, da U Jisu Khrist uba U Trai jong ngi bad da ka jingieit kaba U Mynsiem u ai: To ïasoh bad nga ha ka jingduwai shitrhem sha U Blei na ka bynta jong nga.

³¹ To duwai ba ngan lait na ka jingma na ki bymngeit kiba don ha Judia bad ba ka jingshakri jong nga ha Jerusalem kan long kaba la pdiang da ki briew jong U Blei hangta.

³² Bad kumta ngan wan sha phi da ka jingkmen kaba dap, lada ka long ka mon jong U Blei, bad ngan dap da ka jinghun ba pynpyngngad haba ngan wan khmih ïa phi.

³³ To U Blei, uba long ka tyllong jong ka jingsuk jong ngi, un long ryngkat bad phi baroh. Amen.