Ka Shithi U Paul Sha Ki Nong Rom 14 - Khasi CL Bible (BSI)

Wat bishar ïa la u parabangeit

¹ To pdiang sngewbha ïa u briew uba tlot ha ka jingngeit, hynrei wat ïania bad u shaphang ki jingpyrkhat bashimet jong u.

² Ka jingngeit jong uno uno u briew ka shah ïa u ban bam ïa kano kano ka jingbam, hynrei u briew uba tlot ha ka jingngeit u bam tang da ki jhur.

³ U briew uba bam ïa kiei kiei baroh, um dei ban peitbeiñ ïa uta u bym bam; katba uta uba bam tang da ki jhur um dei ban bishar ïa uta uba bam ïa kaei kaei ruh; naba U Blei u la pdiang ïa u.

⁴ Phi dei uei ban bishar ïa u shakri jong uwei pat? U dei u Kynrad jong u hi u ban rai lada un jop ne un rem. Bad un jop, namar U Trai u lah ban pynlah ïa u ban jop.

⁵ Uwei u briew u pyrkhat ba kawei ka sngi ka kham donkam ban ïa kiwei pat ki sngi, katba uwei pat u pyrkhat ba baroh ki sngi ki ïalong kumjuh. Uwei pa uwei u dei ban skhem ha la ka jong ka jingmut.

⁶ Uno uno uba kheiñ kor bha ïa kano kano ka sngi, un leh kumta ha ka jingburom ïa U Trai, uno uno u ban bam ïa kaei kaei, un leh kumta ha ka jingburom ïa U Trai, namar u ainguh ïa U Blei na ka bynta kata ka jingbam. Uno uno uba kyntait ban bam ïa kino kino ki jingbam, un leh kumta ha ka jingburom ïa U Trai bad u ainguh sha U Blei.

⁷ Ym don uno uno na ngi uba im tang na ka bynta ïa lade, ym don uno uno na ngi uba ïap tang na ka bynta ïa lade.

⁸ Lada ngi im, ka long na ka bynta U Trai ba ngi im, bad lada ngi ïap, ka long na ka bynta U Trai ba ngi ïap. Kumta lada ngi im lane ngi ïap, ngi long ki jong U Trai.

⁹ Naba U Khrist u la ïap bad u la mihpat sha ka jingim khnang ban long U Trai jong kiba im bad jong kiba ïap.

¹⁰ Ma phi te, kiba bam tang ki jhur — balei phi bishar ïa la u parabangeit? Bad ma phi kiba bam ïa kiei kiei baroh — balei phi peitbeiñ ïa la u parabangeit? Baroh na ngi, ngin hap ban ïeng ha khmat U Blei ban shah bishar da u.

¹¹ Naba ka Jingthoh Bakhuid ka ong, “Kumba da shisha nga long U Blei ba-im, ong U Trai, baroh kin dem khohsiew ha khmat jong nga, bad baroh kin phla ba nga long U Blei.”

¹² Uwei pa uwei na ngi te, un hap ban ai jingkheiñ shaphang ïa lade ha U Blei.

Wat pynlong ïa u parabangeit ban kyllon noh

¹³ Te kumta, to ngin sangeh noh na kaba ïabishar uwei ïa uwei pat. Hynrei phi dei ban kut jingmut ban ym leh ïa kaei kaei lano lano ruh ka ban pynlong ïa u parabangeit jong phi ban jynthut lane hap ha ka pop.

¹⁴ Ka jingïasoh jong nga bad U Trai Jisu ka pynlong thikna ïa nga ba ym don ka jingbam ha ka hi, kaba long bymkhuid kat kum ka jinglehniam; hynrei lada u briew u ngeit ba katto katne ka jingbam ka long ka bymkhuid, te ka long bymkhuid ïa u.

¹⁵ Lada phi pynmong ïa la u parabangeit namar kaei kaba phi bam, te phim leh shuh na ka jingieit. To wat ai ba ka jingbam kaba phi bam kan pynsniew ïa u briew ïa uba U Khrist u la ïap na ka bynta jong u!

¹⁶ To wat ai ba kaei kaba phi ñiew ba ka long kaba bha kan ïoh ïa ka kyrteng basniew.

¹⁷ Naba ka Hima U Blei kam long ha kaba bam bad kaba dih, hynrei ka long ka hok, ka jingsuk, bad ka jingkmen kiba U Mynsiem Bakhuid u ai.

¹⁸ Bad haba uno uno u shakri ïa U Khrist ha kane ka rukom, u pynsngewbha ïa U Blei bad la pdiang da kiwei pat.

¹⁹ Te kumta, ngi dei borabor ban thmu ban leh ïa kita kiei kiei kiba wallam ka jingsuk bad kiba ïarap ban pynkhlaiñ iwei ïa iwei pat.

²⁰ To wat pynjot noh ïa kaei kaba U Blei u la leh, na ka daw ka jingbam. Ki jingbam baroh ki long kiba lah ban bam, hynrei ka long ka bym dei ban bam ïa kano kano ka ban pynlong ïano ïano ban hap ha ka pop.

²¹ Ka long kaba dei ban ym bam doh, dih waiñ, lane ban leh kano kano ka ban pynlong ïa la u parabangeit ban kyllon noh.

²² To bat ïa kaei kaba phi ngeit shaphang kane ka kam, hapdeng jong phi bad U Blei. Suk uta u briew u bym sngew ïa ka jingpynrem haba u leh ïa kaei kaei kaba u bishar ba ka long kaba dei!

²³ Hynrei haba u sngew artatien ïa kaei kaba u bam, U Blei u pynrem ïa u haba u bam ïa ka, namar kaei kaba u leh, kam shong nongrim ha ka jingngeit. Bad kaei kaei ka bym shong nongrim ha ka jingngeit ka long ka pop.