Ka Shithi U Paul Sha Ki Nong Rom 13 - Khasi CL Bible (BSI)

Ki kamram sha ki bor synshar

¹ Uwei pa uwei u dei ban kohnguh ïa ki bor synshar, namar ym don ka bor khlem ka jingaibor jong U Blei, bad ïa ki bor synshar kiba don mynta la buh hangta da U Blei.

² Uno uno uba pyrshah ïa ka bor kaba synshar, u pyrshah ïa kaei kaba U Blei u la hukum; bad uno uno uba leh kumta un wallam ka jingbishar pynrem halor lade hi.

³ Naba ïa ki nongsynshar ym dei ban sheptieng da kito kiba leh ïa kaba bha, hynrei da kito kiba leh ïa kaba sniew. Hato phi kwah ban long u bymsheptieng ïa u briew uba don ha ka bor? Te to leh ïa kaei kaba bha, bad un ïaroh ïa phi,

⁴ namar u long u shakri jong U Blei uba trei na ka bynta ka jingbha jong phi hi. Hynrei lada phi leh ïa kaba sniew, te to sheptieng ïa u, namar ka bor jong u ban pynshitom ka long kaba dei. U long u shakri jong U Blei bad u pyntreikam ïa ka jingpynshitom U Blei halor kito kiba leh ïa kaba sniew.

⁵ Namar kane ka daw phi dei ban kohnguh ïa ki bor synshar — ym tang namar ka jingpynshitom U Blei, hynrei na ka bynta ka jingïatiplem ruh.

⁶ Kata ka long ruh balei ba phi dei ban siew ki khajna, namar ki bor synshar ki trei na ka bynta U Blei haba ki pyndep ïa la ki kamram.

⁷ To siew te, kaei kaba phi dei ban siew ïa ki; to siew sha ki ïa ki khajna shimet bad kiba dei ïa ki jingdon jingem jong phi, bad to pyn-i ka jingburom bad to ai ka burom ïa ki baroh.

Ki kamram iwei ïa iwei pat

⁸ To long kiba laitluid na ka jingshah teh na uno uno — ka jingteh kaba phi dei ban shah, ka long tang ban ïa-ieit iwei ïa iwei. Uno uno uba leh ïa kane, u la kohnguh ïa ka Hukum.

⁹ Ki hukum, “Wat klim; wat pynïap briew; wat tuh; wat ikwah ïa kaei kaba dei jong kiwei pat” — ïa kine baroh, bad kino kino kiwei pat, la kynthup lang ha kawei ka hukum, “Ieit ïa u paramarjan jong me kumba ïa lade.”

¹⁰ Lada phi ieit ïano ïano, phin ym leh bymdei ïa u lano lano ruh; ban ieit, namarkata, ka long ban kohnguh ïa ka Hukum baroh kawei.

¹¹ Phi dei ban leh ïa kane, namar phi tip ba ka por ka la poi na ka bynta jong phi ban kyndit noh na kaba ïohthiah. Naba ka khyllipmat ban pynim ïa ngi ka long kham hajan mynta ban ïa kaba mynba ngi la ngeit.

¹² Ka miet ka la jan kut, ka sngi ka la jan sdang. To ngin ïasangeh noh na kaba leh ïa kiei kiei kiba long jong ka jingdum, bad to ngin kieng ïa ki atiar ka jingïaleh ha ka jingshai.

¹³ To ngin leh donakor, kum ki briew kiba im ha ka jingshai jong ka sngi — khlem ki jingsngewbha thala bakhynwin ne ka jingïabuaid, khlem ka jingleh awria lane ka jingleh khlem akor, khlem ka jingïashoh ïadat lane ka jingbishni.

¹⁴ Hynrei to kieng ïa ki atiar jong U Jisu Khrist uba U Trai, bad to sangeh na kaba pynleit jingmut sha ki jinglong jong ka pop kiba pynhun ïa ki jingkwah brai jong ka.