Ka Shithi U Paul Sha Ki Nong Rom 12 - Khasi CL Bible (BSI)

Ka jingim ha ka jingshakri ïa U Blei

¹ Kumta te, ko ki parabangeit jong nga, namar ka jingisynei bakhraw jong U Blei ïa ngi, nga kyrpad ïa phi: To aiti ïa lade kum ka jingkñia ba-im sha U Blei, ba la pynkyntang ha ka jingshakri ïa u bad ka jingpynsngewbha ïa u. Kane ka long ka jingmane bashisha kaba phi dei ban ai.

² To wat pynïasyriem ïa lade bad ki rukom jong kane ka pyrthei, hynrei to ai ba U Blei un pynkylla dur ïa kaba shapoh jong phi da ka jingpynkylla ïa ka jingmut jingpyrkhat jong phi baroh. Te phin lah ban tip ïa ka mon U Blei — kaei kaba bha bad kaba pynsngewbha ïa u bad kaba janai.

³ Bad namar ka jingaiei U Blei ïa nga, nga ong ïa uwei pa uwei na phi: To wat ñiewkor palat than ïa lade ban ïa kaba phi dei ban leh. Pynban, to long adkar ha ki jingmut jingpyrkhat jong phi, bad to bishar ïa lade kat kum ka jingngeit kaba U Blei u la ai ha phi.

⁴ Ngi don bun ki dkhot ha kawei ka met bad baroh kine ki dkhot ki don ki jingtreikam bapher bapher.

⁵ Ha kajuh ka rukom, wat la ngi long shibun, ngi long kawei ka met ha U Khrist, bad la pynïasoh iwei bad iwei pat kum ki dkhot bapher jong kawei ka met.

⁶ Kumta ngi dei ban pyndonkam ïa ki jingai bapher bapher kat kum ka jingaiei U Blei ba la ai ha ngi. Lada ka jingai ïa ngi ka long ban kren ïa ka khubor U Blei, ngi dei ban leh ïa kata kat kum ka jingngeit kaba ngi don;

⁷ lada ka long ban shakri, ngi dei ban shakri; lada ka long ban hikai, ngi dei ban hikai;

⁸ lada ka long ban pynshlur ïa kiwei, ngi dei ban leh kumta. Uno uno uba ïasam bad kiwei u dei ban leh ïa kata da ka jingkylluid mynsiem; uno uno uba don ka iktiar u dei ban trei shitom; uno uno uba pyn-i ka jingsbun ïa kiwei u dei ban leh da kaba kmen.

⁹ Ka jingieit ka dei ban long kaba sngur. To isih ïa kaei kaba sniew, to batskhem ïa kaei kaba bha.

¹⁰ To ieit iwei ïa iwei ha ka jingrhem mynsiem kum ki parabangeit, bad to long kiba da kwah hir hir ban pyn-i ka jingburom iwei ïa iwei pat.

¹¹ To trei shitom bad wat long kiba alhia. To shakri ïa U Trai da ka dohnud kaba aiti lut.

¹² To ai ba ka jingkyrmen jong phi kan pynkmen ïa phi, to long kiba ïaishah ha ki jingjynjar jong phi, bad to duwai ha ki por baroh.

¹³ To ïasam lem ïa ki jingdon jong phi bad ki parabangeit kiba kyrduh, bad to pdiang sngewbha sha ki ïing jong phi ïa ki nongwei.

¹⁴ To kyrpad ïa U Blei ban kyrkhu ïa kito kiba pynshitom ïa phi — ho-oid, to kyrpad ïa u ban kyrkhu, ym ban tim.

¹⁵ To ïakmen bad kito kiba kmen, to ïa-ïam bad kito kiba ïam.

¹⁶ To don ïa kajuh ka jingsngewkhia ïa baroh. To wat long kiba sarong, hynrei to pdiang ïa ki kam kiba kham hapoh. To wat pyrkhat ïa lade kum kiba stad.

¹⁷ Lada uno uno u la leh bymdei ïa phi, to wat siew kylliang ïa u da ka bymdei. To pyrshang ban leh ïa kaei kaba baroh ki ñiew ba ka long kaba bha.

¹⁸ To leh ïa kiei kiei baroh katba phi lah ban im ha ka jingïasuk bad ki briew baroh.

¹⁹ Wat ju pynhiarkput, ko ki paralok jong nga, hynrei pynban, to ai ba ka jingbitar jong U Blei kan leh ïa kata. Namar ka Jingthoh Bakhuid ka ong, “Ngan pynhiarkput, ngan siew kylliang, ong U Trai.”

²⁰ Pynban, kumba ka Jingthoh Bakhuid ka ong: “Lada u nongshun jong phi u thngan, to ai bam ïa u; lada u sliang, to ai ïa u ban dih; naba da kaba leh ïa kane phin pynlong ïa u ban ing da ka jingsngewlehrain.”

²¹ To wat ai ba ka jingsniew kan jop ïa phi; pynban, to jop ïa kaba sniew da kaba bha.