Ka Shithi U Paul Sha Ki Nong Rom 11 - Khasi CL Bible (BSI)

Ka jingisynei U Blei ïa ki Israel

¹ Nga kylli te: Hato U Blei u la kyntait ïa la ki jong ki briew? Em, kam long kumta! Ma nga hi nga long u nong Israel, uba hiarpateng na u Abraham, u dkhot jong ka jait Benjamin.

² U Blei um shym la kyntait ïa la ki jong ki briew, ïa kiba u la jied naduh kaba sdang. Phi tip ïa kaei kaba ka Jingthoh Bakhuid ka ong ha ka jingïathuh shaphang u Elijah ba u ïasaid bad U Blei pyrshah ïa ki Israel:

³ “Ko Trai, ki la pynïap ïa ki nongïathuhlypa jong me bad pynkhyllem ïa ki duwan jong me; nga long sa tang ma nga marwei uba sah, bad ki pyrshang ban pynïap ïa nga.”

⁴ Kaei ka jubab ba U Blei u la ai ïa u? “Nga la buh na ka bynta jong nga, hynñiew hajar ngut ki rangbah ki bym shym la mane ïa u blei thala, u Baal.”

⁵ Ka long kumjuh mynta: Don khyndiat ngut kiba dang sah na kito kiba U Blei u la jied namar ka jingaiei jong u.

⁶ Ïa ka jingjied jong u la pynshong nongrim ha ka jingaiei jong u, ym ha kaei kaba ki la leh. Namar lada ïa ka jingjied U Blei la pynshong nongrim ha kaei kaba ki briew ki leh, te ka jingaiei jong u kan ym long ka jingaiei bashisha.

⁷ Kaei pat te ngin ïa-ong? Ki paid Israel kim shym la shem ïa kaei kaba ki ïawad. Ka la long tang ka kynhun kaba rit kaba U Blei u la jied, kaba la shem ïa kata; kiba sah na kita ki la set kyllut ïa ka jingkhot jong U Blei.

⁸ Kumba ka Jingthoh Bakhuid ka ong, “U Blei u la pynluin ïa ki jingmut bad ki dohnud jong ki, haduh kane hi ka sngi kim lah ban ïohi ne ïohsngew.”

⁹ Bad u Dabid u ong, “Ai ba kin ngat bad sahkut ha ki jingkhawai jong ki; ai ba kin kyllon, ai ba kin shah pynshitom!

¹⁰ Ai ba ki khmat jong ki kin matlah khnang ba kin ym ïohi; bad ai ba kin dem hapoh ki jingjynjar jong ki ha ki por baroh.”

¹¹ Nga kylli te: Haba ki Jiw ki jynthut, hato ki hap sha ka jingjot jong ki? Em, ym kumta! Namar ki la leh pop, ka jingpynim ka la wan sha ki Jentil, ban pynlong ïa ki Jiw ban bishni ïa ki.

¹² Ka pop jong ki Jiw ka la wallam ki jingkyrkhu ba-dap kyrhai ha ka pyrthei, bad ka jingduk ba kynja mynsiem jong ki ka la wallam ki jingkyrkhu ba-dap kyrhai ïa ki Jentil. Te, haduh katno ki jingkyrkhu ba kham khraw kin long haba ïa baroh ki Jiw yn kynthup lang!

Ka jingpynim ïa ki Jentil

¹³ Nga kren mynta ha phi ki Jentil: Katba nga dang long u apostol sha ki Jentil, ngan sngewsarong ha ka kam jong nga.

¹⁴ Lehse, nga lah ban pynlong ïa ki briew jong ka jaitbynriew jong nga hi ban sngewbishni, ba kumta yn lah ban pynim katto katne na ki.

¹⁵ Naba haba ki la shah kyntait, ïa u bynriew la pynkylla na kaba long ki nongshun U Blei sha kaba long ki paralok jong u. Kaei ka ban long te, haba la pdiang ïa ki? Kan long ka jingim ïa kiba la ïap!

¹⁶ Lada ïa u kpu banyngkong la ai sha U Blei, te u kpu baroh uwei ruh u long u jong u; bad lada ïa ki thied jong u dieng la ai ha U Blei, ki tnat ruh ki long ki jong U.

¹⁷ Ïa ki katto katne na ki tnat jong u dieng Olib ba la thung, la pynkheiñ noh, bad ba ïa u tnat jong u dieng Olib khlaw la pynïasoh bad u. Ma phi ki Jentil phi long kum ki dieng Olib khlaw, bad mynta phi ïadon bynta ha ka jingim ba kynja mynsiem bakhlaiñ jong ki Jiw.

¹⁸ Kumta te, phim dei ban ñiewbeiñ ïa kito kiba la pynkheiñ noh kum ki tnat. Kumno phi lah ban sngewsarong? Phi long tang ka tnat; phim kyrshan ïa ki thied — ki thied ki kyrshan ïa phi.

¹⁹ Hynrei phin ong, “Ho-oid, ïa ki tnat la pynkheiñ noh ban ai jaka na ka bynta jong nga.”

²⁰ Kata ka long kaba shisha. Ïa ki la pynkheiñ noh namar kim shym la ngeit, katba phi sah ha la ka jaka namar ba phi ngeit. Hynrei wat sngewsarong na ka bynta kata; pynban, to sheptieng.

²¹ U Blei um shym la pyllait ïa ki Jiw, kiba long kum ki tnat tynrai; hato phi pyrkhat un pyllait ïa phi?

²² Hangne ngi ïohi katno U Blei u long uba sbun bad katno u long uba eh. U long uba eh ïa kito kiba la kyllon, hynrei uba sbun ïa phi — lada phi ïaineh ha ka jingsbun jong u. Hynrei lada phim leh kumta, ma phi ruh phin sa shah pynkheiñ.

²³ Bad lada ki Jiw ki iehnoh ïa ka jingbymngeit jong ki, yn sa buh biang ïa ki ha ka jaka ha kaba ki ju don; naba U Blei u lah ban leh ïa kata.

²⁴ Ma phi ki Jentil phi long kum ka tnat jong u dieng Olib khlaw ïa uba la pynkheiñ bad nangta, pyrshah ïa ka jinglong tynrai, la pynïasoh bad u dieng Olib ba la thung. Ki Jiw ki long kum une u dieng uba la thung; bad kan long kaba kham suk ïa U Blei ban pynïasoh biang ïa kine ki tnat ba la pynkheiñ sha ki dieng jong ki hi.

Ka jingisynei U Blei ïa baroh

²⁵ Ka don ka jingshisha barieh, ko ki parabangeit jong nga, kaba nga kwah ïa phi ban tip, naba kan pynlong ïa phi ban ym pyrkhat katno uba stad phi long. Kata ka long ba ka jingmutlop jong ki paid Israel kam neh sah, hynrei kan neh tang haduh kata ka por ba baroh ki Jentil kin wan sha U Blei.

²⁶ Bad kane ka long kumno ba ïa baroh ki Israel yn pynim. Kumba ka Jingthoh Bakhuid ka ong, “U Nongpynim un wan na Seïon bad un weng noh ïa baroh ka jingbymman na ki khun ki ksiew u Jakob.

²⁷ Ngan pynlong ïa kane ka jutang bad ki haba ngan weng noh ïa ki pop jong ki.”

²⁸ Namar ba ki kyntait ïa ka Khubor Babha, ki Jiw ki long ki nongshun jong U Blei na ka bynta jong phi ki Jentil. Hynrei namar ka jingjied U Blei, ki long ki paralok jong u namar ki kpa tymmen jong ki.

²⁹ Naba U Blei um shym la pynkylla ïa ka jingmut jong u shaphang jongno ba u jied bad u kyrkhu.

³⁰ Na ka bynta jong phi ki Jentil, phim shym kohnguh ïa U Blei mynshuwa; hynrei mynta phi la ïohpdiang ïa ka jingisynei U Blei namar ki Jiw ki la long ki bymkohnguh.

³¹ Ha kajuh ka rukom, namar ka jingisynei kaba phi la ïohpdiang, ki Jiw mynta kim kohnguh ïa U Blei, khnang ba ma ki ruh mynta kin ïohpdiang ïa ka jingisynei U Blei.

³² Naba U Blei u la pynlong ïa baroh ki briew, ki koidi jong ka jingbymkohnguh, khnang ba un lah ban pyn-i ïa ka jingisynei ïa ki baroh.

Ka jingïaroh ïa U Blei

³³ Katno ka long kaba khraw ka spah jong U Blei! Katno ki long kiba jylliew ka jingstad bad ka jingtip jong u! Uei uba lah ban batai ïa ki jingrai jong U? Uei uba lah ban sngewthuh ïa ki lynti jong u?

³⁴ Kumba ka Jingthoh Bakhuid ka ong, “Uei uba tip ïa ka jingmut U Trai? Uei uba lah ban ai jingmut ïa U?

³⁵ Uei uba la ju ai ei ei ïa u, ba u hap ban siew pat ïa kata?”

³⁶ Naba ïa baroh kiei kiei la thaw da u, bad baroh kiei kiei ki long lyngba jong u bad na ka bynta jong u. Ha U Blei, to long ka burom junom! Amen.